Kryetari i Prishtinës, Përparim Rama, ka reaguar ashpër ndaj vendimit për mbylljen e përkohshme të pishinës së Gërmisë, duke e quajtur atë një veprim të motivuar politikisht dhe jo në interes të qytetarëve.
Në një reagim në Facebook, Rama kujton se më 24 korrik, vetëm pak orë para se të mbahej ceremonia për kandidimin e tij në amfiteatrin e Gërmisë, pishina u mbyll me arsyetimin se uji ishte i ndotur – bazuar në analiza të paplota e të përkohshme. Por, sipas tij, një ditë më pas, më 25 korrik, analizat përfundimtare të IKSHPK-së treguan se uji është brenda standardeve dhe pishina u rihap menjëherë për publikun.
“Uji nuk ndryshon brenda nate! Ky nuk është kujdes, është kalkulim politik”, deklaroi Rama, duke akuzuar autoritetet për instrumentalizim të institucioneve shtetërore në funksion të luftës elektorale.
Ai shtoi se përdorimi i frikës dhe alarmit për përfitime politike është një praktikë e rrezikshme, moralisht e dënueshme dhe ligjërisht e sanksionueshme. “Institucionet ekzistojnë për t’i mbrojtur qytetarët, jo për t’i manipuluar ata në emër të kalkulimeve elektorale”, tha ai.
Rama kërkoi që zyrtarët publikë të ruajnë integritetin profesional dhe të mos bëhen vegla të askujt në kohë fushate, duke e vendosur interesin qytetar mbi çdo interes partiak.
“Qytetarët nuk janë dhe nuk duhet të jenë mjet elektoral”, përfundoi ai.
