“Mendimi për Motin” në parashikimin e sotëm ka paralajmëruar vendosje të rekordit të ri të temperaturave.
Sot, në disa vende temperaturat mund të arrijnë deri në 43 dhe 44 gradë, duke tejkaluar rekordin e vendosur dje në qytetin e Klinës.
Ndërsa nuk përjashtohen edhe rrebeshe shiu.
Postimi i plotë:
Temperatura rekorde priten edhe sot
Dita e djeshme, e premte 25 korriku 2025, do të shënohet si ditë historike në klimën e Kosovës, me temperatura rekorde që u regjistruan në disa pjesë të vendit. Sipas IHMK-së, në stacionin meteorologjik në Klinë temperatura maksimale arriti deri në 42.5C. Deri në orën 16 në Han të Elezit maksimalja arriti në 41.6C, 41C në Rahovec e Suharekë e 40C në Leposaviq. Mjaft të larta deri në orën 14 ishin në Prizren me 40.3C, dhe Gjakovë 40.7C. 38.4C në Prishinë, 39.6C në Gjilan e 39.7C në Kamenicë. 38.8C në Istog e Komoran dhe 38.7C në Skënderaj. Më në veri nga Mitrovica 39C. Në aeroportin e Prishtinës u regjistrua temperatura maksimale arriti në 38.1C deri në orën 16.
Deri më tani temperaturat rekorde në vend janë regjistruan në Prizren, prej 40.8C me 25 korrik 1987, si dhe në aeroportin e Prishtinës 40.6C, më 24 korrik 2007. Temperatura maksimale prej 41C u regjistruan edhe në fillim të javës në Han të Elezit, më 21 e 22 korrik 2025, dhe 40C më 21 korrik në Suharekë.
Temperatura mjaft të larta ditën e djeshme u regjistruan përgjatë rajonit gjithashtu. 42C ishin maksimalet në Shkup. 42.8C në Demir Kapi dhe 43.1C në Gjevgjeli. Në Shqipëri, në Vlorë u regjistrua temperatura rekorde për këtë qytet, me 42.4C, ndërsa në Sarajevë me 38.9C ishte hera e tretë brenda muajit që thyhet rekordi për muajin korrik.
Për ditën e sotme të shtunën, modelet numerike parashikojnë që temperaturat maksimale në nivel vendi të jenë më të larta se dje, deri në 40C e 41C. Lokalisht edhe sot ka mundësi të arrinë vlera rekorde prej 42C e 43C, apo në raste më të izoluara 44C.
Hapësira kohore që temperaturat sot të arrinë në vlera ekstreme, është paksa më e kufizuar, meqenëse parashihen zhvillime të vransirave me rrebeshe shiu e bubullima nga mesdita. Këto rrebeshe që është mjaft e mundshme të zhvillohen përgjatë pjesëve jugore e jugperëndimore të vendit, pritet të shoqërohen me erëra më të fuqishme, me hove prej 20m/s, (70km/h), që ndalojnë rritjen e temperaturave deri në maksimum, zakonisht pasdite më vonë në orën 16 apo 17.
