Në një ditë me zhvillime intensive politike, presidentja e Kosovës, Vjosa Osmani, ka zhvilluar takime të ndara me liderin e Lëvizjes Vetëvendosje, Albin Kurti, dhe kryetarin e Nismës Socialdemokrate, Fatmir Limaj.
Këto takime janë mbajtur vetëm pak orë para mbledhjes së 55-të të Kuvendit, e cila është thirrur në përpjekje për të përmbyllur procesin e konstituimit të tij, raporton Klani.
Kuvendi ka hyrë në një fazë kritike, pasi në seancën paraprake – të 53-tën me radhë – që nisi në orën 14:00, deputetët nuk arritën të sigurojnë votat e nevojshme për zgjedhjen e Albulena Haxhiut në krye të legjislativit. Për pasojë, një tjetër përpjekje është caktuar për në orën 22:00 të së njëjtës ditë.
Presioni kohor është shtuar edhe më tej nga afati që përfundon në mesnatë – i vendosur nga Gjykata Kushtetuese – ku theksohet se konstituimi i Kuvendit duhet të përfundojë deri më 26 korrik.
E gjitha kjo ndodh në një sfond të pasigurisë ligjore, pasi Gjykata Kushtetuese, disa ditë më parë, ka miratuar një masë të përkohshme, e cila i ndalon deputetët të ndërmarrin veprime për konstituimin e Kuvendit deri në një vendim të mëtejshëm.
