Agjencia e Menaxhimit Emergjent ka raportuar për një situatë shqetësuese me zjarre në mbarë vendin gjatë orëve të pasdites.
Sipas raportit zyrtar për periudhën 14:00 – 20:00, janë regjistruar gjithsej 80 vatra zjarri, prej të cilave 35 mbeten ende aktive, ndërsa 45 janë lokalizuar nga ekipet emergjente.
Situata më e rënduar paraqitet në Komunën e Klinës, konkretisht në fshatrat Siqevë dhe Resnikë, ku terreni i vështirë po pengon ndërhyrjen e shpejtë.
Fatmirësisht, nuk raportohet për viktima apo persona të lënduar, ndërsa të gjitha kapacitetet e Agjencisë dhe Njësive të Zjarrfikësve janë në terren dhe po punojnë për vënien nën kontroll të situatës.
AME u bën thirrje qytetarëve për kujdes të shtuar, duke kërkuar të shmangin çdo veprim që mund të shkaktojë zjarr dhe të raportojnë menjëherë çdo rast të dyshimtë në numrat emergjentë 112, 193 ose 192.
Agjencia falënderon zjarrfikësit për përkushtimin, si dhe Policinë e Kosovës dhe KFOR-in për mbështetjen e dhënë në menaxhimin e situatës.
Njoftimi i plotë:
Raport për situatën me zjarre
Periudha raportuese: 14:00 – 20:00
Data: 27 Korrik 2025
Sipas të dhënave të pranuara në Qendrën Operative të Agjencisë, gjatë gjashtë orëve të fundit janë raportuar gjithsej 80 vatra zjarri. Prej tyre, 35 janë ende aktive, ndërsa 45 janë lokalizuar.
Situata më e vështirësuar paraqitet në Komunën e Klinës, konkretisht në fshatrat Siqevë dhe Resnikë.
Fatmirësisht, deri më tani nuk është raportuar për viktima apo persona të lënduar.
Situata po menaxhohet nga AME dhe Njësitë e Zjarrfikësve me të gjitha kapacitetet në dispozicion.
U bëjmë thirrje të gjithë qytetarëve të tregojnë kujdes të shtuar, të shmangin çdo veprim që mund të shkaktojë zjarr dhe të raportojnë menjëherë çdo vatër të dyshimtë në numrat emergjentë 112, 193 ose 192.
Agjencia, në bashkëpunim me Njësitë e Zjarrfikësve dhe Policinë e Kosovës, mbetet në gatishmëri të plotë.
Agjencia falënderon zjarrfikësit për përkushtimin e tyre të palodhshëm, Policinë e Kosovës dhe KFOR-in për mbështetjen, si dhe qytetarët për bashkëpunimin.
