Deputetja e LVV-së, Fitore Pacolli, e ka quajtur ‘gazetare të nënshtruar’- gazetaren e emisionit Info Plus në RTK, derisa ajo po e pyeste se a janë të vërteta raportimet se vëllai dhe daja i Pacollit kanë përfituar subvencione nga Ministria e Bujqësisë.
Ajo u kap keq me gazetaren e RTK-së, duke e pyetur se pse nuk e ka ftuar më herët në emision për të folur për këtë temë.
“Ju si gazetare kur unë jom sulmu kaq shumë për këto dy tema ish dashtë me m’thirrë atëherë me diskutu. Jo, jo, jo, jo, jo, jo. Intervistën e vetme e kam dhanë te emisioni te Fidani. Nëse të intereson me i ditë detajet mundesh me shku me këqyr aty”, tha deputetja.
Pacolli gjatë intervistës nuk i ka mohuar pyetjet e gazetares, por e ka sulmuar atë për trajtimin e temës duke i dhënë leksione gazetareske.
“Si grua nuk te ka interesu se si jam ndier kur jam sulmuar”, shprehet Pacolli.
“Nuk ju sulmoi askush se jeni grua”, i thotë gazetarja.
“Ti nuk je gazetare neutrale. Me vjen keq por jeni nënshtruar”, i thotë Pacolli, gazetares.
