Asociacioni i Gazetarëve të Kosovës e ka cilësuar të paprecedent, personal dhe shumë të rrezikshëm sulmin e deputetes së Fitore Pacolli kundër gazetares së RTK-së, Blerta Foniqi – Kabashi.
Pacolli u kap me gazetaren e RTK’së, pasi ajo e pyeti për raportimet për subvencionet e ndara nga Ministria e Bujqësisë për dajën dhe vëllain e saj, duke e pyetur se pse nuk e ka ftuar më herët në emision. Pas intervistës, Pacolli ka bërë një postim ku ka thënë se pyetjet e gazetares ishin “të dirigjuara” dhe e ka sulmuar të njëjtën.
“Kjo është po e njëjta gazetare që heshti kur më sulmuan publikisht muaj më parë. Asokohe nuk kishte interes për të dëgjuar versionin tim. Nuk më ofroi hapësirën në emision. Sot, papritur, i nevojiteshin përgjigjet sepse kështu e urdhëruan. Gazetaria me porosi funksionon kështu”, ka shkruar Pacolli.
AGK ka thënë se kjo formë e linçimit të gazetares nga një deputete e zgjedhur është jashtëzakonisht e rrezikshme, dhe u jep platformë mijëra të tjerëve që të vazhdojnë sulmet.
“AGK-ja e fton deputeten Pacolli dhe të gjithë zyrtarët e tjerë që të përmbahen nga deklaratat e komentet nxitëse kundër gazetarëve, dhe në vend të kësaj të ofrojnë transparencë, duke u përgjigjur në të gjitha pyetjet e interesit publik”
