Lëvizja Vetëvendosje sot është duke u krenuar me dërgimin e FSK-së në veri për kërkimin e trupit të mërgimtarit, i cili dyshohet se është mbytur në liqenin e Ujmanit. Ndonëse ky operacion humanitar është mundësuar në bazë të marrëveshjes ish-kryeministrin Hashim Thaçi me ish-sekretarin e NATO-s, Anders Fogh Rasmussen(19 prill, 2013”, VV-ja nuk e potencon fare këtë fakt.
Shumë deputetë e zyrtarë të lartë të kësaj partia kanë tentuar ta shesin këtë operacion si fitore të madhe, duke harruar qëndrimet e më hershem ndaj marrëveshjes Thaçi – NATO.
Marrëveshjen në fjalë Albin Kurti dhe parti e tij më vitet të tera e kanë kritikuar ashpër.
Madje, pas ardhjes në pushtet, në shkurt të vitit 2020, nga objekti i Qeverisë, Albin Kurti e kishte denoncuar këtë marrëveshje.
Në një konferencë të jashtëzakonshme për media, ai e kishte publikuar marrëveshjen në fjalë, duke thënë se ajo ka qenë ujdi e fshehtë dhe e dëmshme për Kosovën.
Me këtë rast, ai kishte paralajmëruar se këtë marrëveshje do ta adresonte edhe në gjyqësor.
“Fshehja e një marrëveshjeje të tillë që nga 19 prilli 2013, kur menduam se kishte vetëm një marrëveshje, dhe ishin dy, ne e konsiderojmë si shkelje flagrante dhe kjo duhet të adresohet nga gjyqësori. Unë do të doja të shfrytëzoja këtë mundësi për të theksuar pozicionin tonë në partneritet me NATO-n dhe KFOR-in”, kishte thënë Kurti, duke vazhduar kritikat ndaj marrëveshjes.
“Kjo marrëveshje është një moment vendimtar në të cilin u shpik termi ‘Kosova e Veriut’ dhe thuhet se FSK nuk do të shkojë atje pa pëlqimin paraprak të KFOR-it, i cili nuk është aprovuar nga institucionet e Kosovës dhe për të cilin nuk është informuar Kuvendi dhe tregon se Asiociacioni i komunave me shumicë serbe dhe shkëmbimi i territoreve nuk janë dy gjëra të ndryshme”, ishte shprehur Kurtti.
Ai kishte treguar dokumentin e marrëveshjes së fshehur e mori nga një zyrtar i NATO-s dhe nuk e gjeti atë në zyrën e kryeministrit.
Sulmet ndaj kësaj marrëveshje, Kurti nuk i kishte ndalur as në mandatin e dytë.
Ai me shumë qejf fliste për këtë marrëveshje, sa herë që shfaqeshin kriza në veri.
Në çdo adresim të tij, Kurti e sulmon ish-kryeministrin, duke thënë se kjo ujdi ka qenë antikushtetuese.
Një gjë të tillë e kishte bërë edhe pas sulmit në Basnjë, ku u vra polici i Kosovës, Afrim Bunjaku.
Në një mbledhjeje të Këshillit të Përgjithshëm të Lëvizjes Vetëvendosje, ai kishte thënë se FSK-ja nuk mund të dërgohet në veri për shkak të kësaj marrëveshje.
“Është zotimi i njëanshëm ndaj NATO-s i një pararendësi tim që nuk lejon FSK-në të futet në veri, por kufiri ynë duhet të ruhet. Ky vakum që është atje duhet të mbushet, dhe për këtë jemi duke shtuar bashkëpunimin me partnerët e aleatët tanë ndërkombëtarë, e ata praninë e NATO-s, KFOR-it atje. Për këtë akt të agresionit ndaj republikës sonë, Serbia duhet të ndëshkohet ndërkombëtarisht sepse sa herë që ajo nuk është ndëshkuar për krimet e saj, ajo i ka përsëritur ato dhe kjo nuk duhet lejuar”, kishte thënë Kurti.
Kritikat ndaj kësaj marrëveshje Kurti i kishte përsëritur edhe pas sulmit terrorist në kanalin e Ibër-Lepencit, më 29 nëntor.
Në konferencën për media, ai kishte thënë se Kosova është e hendikepuar në veri për shkak të marrëveshjes Thaçi – NATO-n.
“Në veri jemi të hendikepuar pasi ushtria jonë, që nga zotimi i Thaçit në 2013, s’mund të shkojë në veri e atje s’është situata si në pjesë të tjera të vendit tonë. Nga nervozizmi, Serbia i rrit aksionet e tilla, meqë nuk e posedojnë më veriun e Kosovës. Dëshirojnë të thonë se s’do t’iu lëmë rehat. Kjo tregon se ata kanë humbur, por nuk duan që ne të fitojmë, të jetojmë…”, kishte thënë Kurti.
