Përfshirja e FSK-së në operacionin e kërkim-shpëtimit në liqenin e Ujmanit në veri të vendit, ka ngjallur reagime të ndryshme. Por sipas njohësit të çështjeve të sigurisë, Drizan Shala, ky angazhim është tërësisht i pastër me vendimin e NATO-s dhe KFOR-it, duke pasur qëllim humanitar dhe jo ushtarak.
Shala i tha Lajmi.net se ky operacion është zhvilluar në bashkëpunim të ngushtë me KFOR-in dhe përbën një angazhim legjitim dhe profesional në përputhje me mandatin kushtetues të FSK-së.
“Operacioni i zhvilluar së fundmi në liqenin e Ujmanit, me pjesëmarrjen e FSK-së në bashkëpunim të ngushtë me misionin e KFOR-it, paraqet një angazhim legjitim dhe profesional në funksion të misionit të saj kushtetues për mbrojtjen e jetës dhe sigurisë së qytetarëve”, tha ai.
Ai nënvizon se FSK-ja është e pajisur me kompetenca të plota për operacione të tilla dhe se përfshirja e KFOR-it garanton transparencë dhe mbështetje ndërkombëtare.
“FSK është e pajisur me mandat të qartë për operacione të kërkim-shpëtimit, reagim emergjent dhe asistencë në raste fatkeqësish natyrore, ndërsa pjesëmarrja e KFOR-it dëshmon për transparencën dhe koordinimin ndërkombëtar të këtij veprimi”, vazhdoi Shala.
Shala ka kritikuar deklaratat politike të VV-së, të cilat e kanë përshkruar këtë operacion si “zbarkim të FSK-së në veri”, duke i quajtur të rrezikshme dhe të dëmshme për sigurinë e vendit.
“Megjithatë, deklaratat politike të Vetëvendosjes që e cilësojnë këtë operacion si ‘zbarkim të FSK-së në veri’ kanë potencial të krijojnë tension artificial në terren dhe të deformojnë natyrën e operacionit, duke nxitur një narrativë të panevojshme për ‘militarizim’ të veriut të Kosovës”, tha ai për lajmi.net
Sipas tij, kjo retorikë mund të keqpërdoret nga faktorë të jashtëm për të paraqitur Kosovën si provokatore, këto vijnë veçanërisht nga qarqe të afërta me Beogradin zyrtar, për të ngritur pretendime të rreme për provokim.
“Ky lloj retorike mund të keqpërdoret nga aktorët destabilizues në rajon, veçanërisht nga qarqe të afërta me Beogradin zyrtar, për të ngritur pretendime të rreme për provokim apo shkelje të marrëveshjeve ndërkombëtare”, u shpreh Shala.
Në fund, Shala thekson rëndësinë e bashkëpunimit me partnerët ndërkombëtarë dhe rolin që luan koordinimi me NATO-n në ruajtjen e stabilitetit.
“Në raport me ndërkombëtarët, është e rëndësishme të theksohet se çdo veprim i FSK-së në këtë rast është kryer me koordinim dhe mbështetje të plotë të partnerëve të NATO-s dhe KFOR-it, duke shmangur çdo interpretim të njëanshëm”, tha njohësi i sigurisë.
Tashmë po raportohet në media vendore se FSK e ka gjetur trupi e 33 vjeçarit mërgimtar, ndonëse ende nuk kemi një konfirmim zyrtar nga Policia e Kosovës.
