Presidentja e Mekanizmit Ndërkombëtar Rezidual për Gjykatat Penale (MRMGP), gjyqtarja Graciela Gatti Santana, sot ka marrë vendim me të cilin refuzon kërkesën e ish-komandantit të Ushtrisë së Republikës Serbe të Bosnje-Hercegovinës, kriminelit të luftës Ratko Mladiq, për lirimin e parakohshëm për arsye humanitare.
Krimineli Mlladiq, i cili po vuan dënimin me burgim të përjetshëm për gjenocid, krime kundër njerëzimit dhe shkelje të ligjeve dhe zakoneve të luftës të kryera gjatë luftës në Bosnje dhe Hercegovinë, ka dorëzuar kërkesën më 2 qershor të këtij viti, duke iu referuar një sëmundjeje të pashërueshme të pretenduar dhe një jetëgjatësie të shkurtër të pritshme.
Në vendim, Mekanizmi thekson se, megjithëse gjendja shëndetësore e Mlladiqit është përkeqësuar për shkak të moshës dhe sëmundjeve të rënda, gjendja e tij aktualisht është stabile dhe nuk përmbush kushtet për rrethana të jashtëzakonshme humanitare që do të justifikonin lirimin e parakohshëm, raporton klix.ba.
Gjetjet mjekësore tregojnë se, edhe pse është në rrezik për jetën dhe varësisht funksionalisht nga ndihma e të tjerëve, ai nuk vuan nga një sëmundje akute e pashërueshme, transmeton Telegrafi.
“Kushtet e paraburgimit të tij janë plotësisht në përputhje me parimet e humanizmit dhe dinjitetit, me kujdes të cilësisë së lartë dhe kontakte të rregullta me familjen,” thuhet në vendim.
Mekanizmi thekson se krimineli Mlladiq kalon shumicën e kohës në spitalin special të burgut në Hagë (JCvSZ), ku është nën mbikëqyrje të vazhdueshme të një ekipi mjekësor dhe ka qasje në terapi dhe vizita.
Megjithëse një nga gjyqtarët, Prisca Matimba Nyambe, ka shprehur mendimin se kërkesa duhet të aprovohet duke pasur parasysh përkeqësimin e gjendjes shëndetësore dhe “kushtet potencialisht çnjerëzore”, shumica e gjyqtarëve të konsultuar nuk janë pajtuar me këtë qëndrim.
Ata kanë konsideruar se nuk është provuar ekzistenca e arsyeve të mjaftueshme humanitare që të mbizotërojnë mbi interesat e drejtësisë dhe rëndësinë e krimeve për të cilat është dënuar Mlladiq.
Mladiq është arrestuar në vitin 2011 në Serbi dhe është dënuar në vitin 2017 nga Gjykata Ndërkombëtare Penale për ish-Jugosllavinë, ndërsa dënimi i tij u konfirmua në vitin 2021. Ai ndodhet në njësi paraburgimi të OKB-së në Hagë për më shumë se 14 vjet.
Mekanizmi ka urdhëruar që t’iu vazhdohet qasje maksimale të anëtarëve të familjes sipas gjendjes së tij shëndetësore, dhe presidentja do të vazhdojë të ndjekë gjendjen shëndetësore dhe të marrë të gjitha masat e nevojshme.
