Ish-eprori i Ushtrisë Çlirimtare të Kosovës dhe lideri i BDI-së në Maqedoninë e Veriut, Ali Ahmeti, ka qenë pjesë e protestës së sotme në Prishtinë kundër Gjykatës Speciale.
Ahmeti ka mbajtur një fjalim para qytetarëve që kishin dalë për të kundërshtuar, siç u tha, padrejtësitë që po u bëhen ish-krerëve të UÇK-së nga Dhomat e Specializuara në Hagë.
Ai përshkroi rrugën drejt Prishtinës si një marshim të përbashkët të shqiptarëve nga të gjitha anët për të kërkuar drejtësi.
“Trupi rridht më shkonte rrugës kah vija, djem e vajza, mu si në vitet kur në Kosovë ushtroheshte dhunë dhe i tërë populli organizohej kundër regjimit barbara. Shqiptarët nga të gjitha anët, Struga, Kërçova, Gostivari, Tetova, Shkupi, Kumanova, sot vërshnonin rrugët drejt pjesëmarrjes në këtë protestë për drejtësi. Kombi ynë historikisht ka qenë i bashkuar si një trup i vetëm kur ne na është rrezikuar identiteti dhe dinjiteti. Prandaj, sot si një trup, jemi këtu për të kërkuar liri për lirimtarët që po trajtohen padrejtësisht nga Gjykata Speciale. Kemi dalur për të kërkuar të drejtën tonë. UÇK-ja ka bërë luftë të drejtë, luftë për liri, luftë për çlirim nga pushtimi. Që nga viti 1994 kur filloi të komunikohej veprimet e saj, ajo ka qenë e qartë për qëllimin e saj çlirimtar. Ushtria Çlirimtare e Kosovës i është përmbajtur ligjeve ndërkombëtare të luftës përfshirë konventën e Gjenevës, të vitit 1949”, tha Ahmeti.
Në fjalën e tij, ai akuzoi Gjykatën Speciale për mungesë paanësie dhe për shkelje të të drejtave të të akuzuarve.
“Në rajonin tonë, në disa lider të ri më së shumti mungon bashkëpunimi, stabiliteti e qartësia pro-perëndimore. Kush i mban të mbyllur këta kontribuues stabiliteti, punon kundër stabilitetit tonë, dhe vet Perëndimit në Ballkan. Gjatë luftërave, pas tyre, e deri më sot, asnjëherë Serbia e zyrtarët e Maqedonisë nuk janë pajtuar me të drejtat e shqiptarëve. Serbia po bën gjithçka për zhbërjen e pavarësisë së Kosovës përmes Gjykatës Speciale të Hagës. Po përpiqet të përmbys çdo të arritur në Kosovë. Gjykata u formua si u formua, u votua si u votua nga deputetë, u bë si u bë, ishte si ishte, por edhe ashtu siç u krijua, ajo nuk po e respekton të drejtën për një gjykim të paanshëm, të drejtë e brenda afatit të aryeshëm”, deklaroi ai.
Në fund, Ahmeti theksoi se kjo gjykatë, sipas tij, po përdor prova nga burime të diskredituara.
“Ajo punon sikur Serbia, duke pranuar prova nga ata që kanë kryer krime”, tha ndër të tjera Ali Ahmeti.
