Ish-kryesuesi i Kuvendit Komunal të Drenasit, Naim Bazaj, do të garojë nën siglën e “Iniciativës për Drenasin”.
Bazaj është certifikuar nga KQZ-ja për të marrë pjesë në zgjedhjet lokale në Komunën e Drenasit, ku gara reale për kryetar pritet të jetë mes Petrit Hajdarit e Ramiz Lladrovcit.
“Me kënaqësi ju njoftoj se Iniciativa Qytetare ‘Për Drenas e Kosovë – PDK’ është zyrtarisht e certifikuar nga Komisioni Qendror i Zgjedhjeve (KQZ) për të marrë pjesë në zgjedhjet lokale të 12 tetor 2025”, tha Bazaj.
“Unë, si kandidat për Kryetar Komune, së bashku me listën tonë për Kuvendin Komunal, do të garoj në emër të kësaj iniciative, me bindjen e plotë se Drenasi meriton më shumë dhe më mirë. Ne nuk jemi servilë të askujt as nuk behemi, Ne nuk jemi argat të atye klanëve qe të pytet Prishtina e rrethina”, tha ai.
“Ne jemi vetvetja zëri i qytetarëve të Drenasit. Të thjeshtë, të ndershëm dhe të përkushtuar për ndryshim të vërtetë, e jo piuna e të përfituesvë të tjerëve!”.
Në parafushatën e zgjedhjeve të vitit 2016, Bazaj, asokohe zyrtarisht pjesë e PDK-së, kishte bërë fushatë 12-ditore nëpër fshatrat e Drenasit duke u paraqitur si kandidat i partisë për zgjedhjet e ardhshme lokale.
Kur partia e kishte nominuar Lladrovcin për kryetar, ai i indinjuar kishte shpallur kundër-kandidaturën e tij ndaj Lladrovcit si kandidat i pavarur.
Në momentet e fundit, në një tubim të ftuar me përkrahësit e tij ku planifikoi të zyrtarizonte nisjen e fushatës për për kryetar, Bazaj i befasoi edhe përkrahësit e tij duke u shfaqur përkrah Kadri Veselit, asokohe kryetarit të PDK-së.
Me ndërmjetësimin e Veselit, Bazaj tha se do ta përkrahte PDK-në dhe Lladrovcin në zgjedhje, ndonëse vetëm disa më përpara kishte akuzuar Kryesinë e PDK-së për “sjellje me zarf” të nominimit të Lladrovcit.
Bazaj, siç ishte dëshmuar në fushatën e zgjedhjeve të vitit 2016, ka një përkrahje të konsiderueshme për të luajtur rol kyç si lojtar në zgjedhjet komunale. Baza e përkrahësve të tij është Tërsteniku, vendi i tij i lindjes.
Kujtojmë se muajin e kaluar në një aksion të drejtuar nga Drejtoria për Hetimin e Krimit të Organizuar dhe Krimeve të Rënda, në bashkëpunim me Prokurorinë Themelore në Prishtinë, ka rezultuar me arrestimin në flagrancë të Naim Bazaj, rreth 54-vjeçar, i dyshuar për disa vepra penale të rënda, përfshirë “Detyrim”, “Prezantim i rremë si person zyrtar” dhe “Mbajtje të paautorizuar të armëve”.
Sipas burimeve të Sinjalit, ndaj të dyshuarit ishin zhvilluar hetime intensive për disa javë, të cilat kulmuan më 04 korrik 2025, kur me asistimin e njësive të specializuara, ai u arrestua në flagrancë gjatë zhvillimit të veprës penale.
Gjatë kontrollit të banesës dhe objekteve përcjellëse, Policia ka sekuestruar një arsenal armësh dhe municioni, përfshirë: një armë e gjatë me dylbi, një tyte dhe 200 fishekë kalibër .22 Remington, 1 armë automatike me 15 fishekë dhe një karikator, 1 pushkë gjahu me dy tyta dhe 46 fishekë, 1 armë ajrore 4.5 mm (Made in Germany), 1 pistoletë Sig Sauer me një karikator dhe 29 fishekë, 1 pistoletë AG-9 me dy karikatorë dhe pajisje përcjellëse, 1 iPhone 14 Pro Max dhe 1 kontratë dhe dokumentacion i armës në emër të Fitim Bazaj.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
