Akgjykimi 42 faqesh i Gjykatës Kushtetuese për bllokadën në Kuvend përfshin edhe komentet e Lëvizjes Vetëvendosje ndaj pretendimeve lidhur me vlerësimin e kushtetutshmërisë së vendimit të Kuvendit për votimin e Komisionit për votim të fshehtë, në kuadër të vazhdimit të seancës konstituive.
Më 12 korrik 2025, deputetja Saranda Bogujevci kishte dorëzuar komentet lidhur me kërkesat, ku kishte argumentuar, në emër të partisë se votimi i fshehtë është i lejueshëm si kompromis mes deputetëve, transmeton Klankosova.tv.
Madje, propozimin e kryesuesit të seancës, Avni Dehari, për formimin e komisionit për votim të fshehtë, kjo parti e ka quajtur si përpjekje të sinqertë për gjetjen e “kompromisit apo konsensusit të nevojshëm.
“Pretendimet e parashtruesve të kërkesave kundërargumentohen nga deputetja e Lëvizjes Vetëvendosje!, Znj. Saranda Bogujevci, e cila në komentet e dorëzuara në Gjykatë, në emër te Lëvizjes Vetëvendosje!, në thelb, thekson që (i) votimi i fshehtë është i lejueshëm si një kompromis i mundshëm mes deputetëve, me qëllim të konstituimit të Kuvendit; dhe (ii) propozimi i Kryesuesit të Seancës për formimin e komisionit për votim të fshehtë paraqet përpjekje të sinqertë për të gjetur “kompromisin apo konsensusin” e nevojshëm për mënyrën e votimit, me qëllim të konstituimit të Kuvendit; (iii) mos-pjesëmarrja e deputetëve në votimin për formimin e komisionit për votim të fshehtë bllokon shprehjen e vullnetit të shumicës; dhe (iv) të gjithë deputetët e zgjedhur të Kuvendit kanë për obligim gjetjen e një mënyre për të zgjedhur Kryetarin dhe nënkryetarët e Kuvendit.”, thuhet në vendimin e Kushtetueses.
Nga pika 62 deri në pikën e 85-të janë të renditura të gjitha pretendimet e VV-së, të cilët thonë se “votimi i fshehtë është e drejtë demokratike që nuk përbën ndryshim procedure, ndryshim rendi të ditës apo cenim të rrjedhës së seancës konstituive dhe se deputetët që janë kundër kësaj forme mjafton të shprehin vullnetin e tyre duke votuar kundër.”
“Në këtë drejtim, deputetët e Lëvizjes Vetëvendosje! shtojnë se për dallim nga parashtruesit e kërkesave, ata nuk tentojnë që t’i ikin detyrimit për bashkëpunim në mirëbesim, kompromis dhe konsensus dhe për konsultime konstruktive, por kërkojnë nga Gjykata që “ta ritheksojë atë çka e ka përsëritur dy herë në aktgjykimin e fundit: “Një detyrim i tillë vlen edhe për grupet e tjera parlamentare”.” – përfundon pika e fundit.
Ky institucion ka konstatuar që kryesuesi i seancës konstituive, Avni Dehari, duhet të vazhdojë me pikën 3 të rendit të ditës të miratuar më 8 prill 2025, dhe të ftojë përfaqësuesin e grupit më të madh parlamentar, në këtë rast VV-në, për të propozuar kandidatin për kryetar të Kuvendit, i cili zgjedhet përmes votimit të hapur dhe ky proces mund të realizohet vetëm deri në 3 herë për kandidatin e njëjtë.
“Rrjedhimisht, Gjykata në vijim përcakton që deputetët e zgjedhur të Kuvendit duhet të zgjedhin Kryetarin/en dhe nënkryetarët e Kuvendit të Republikës së Kosovës sipas pikave 3 dhe 4 të rendit të ditës të Seancës Konstituive brenda 30 (tridhjetë) ditëve nga dita e hyrjes në fuqi të këtij Aktgjykimi.” /Klankosova.tv
