Ministri në detyrë i Financave, Hekuran Murati u është kthyer interpretimeve të Kushtetutës dhe vendimeve të Gjykatës Kushtetuese.
Murati në një postim në Facebook ka thënë se kryesuesi i seancës konstituive, Avni Dehari dhe grupi parlamentar i VV-së, kanë vepruar në përputhje me Kushtetutën, duke marrë parasysh aktgjykimin e vitit 2014 të Gjykatës Kushtetuese.
“Kryesuesi i Seancës Konstituive z. Avni Dehari, dhe Grupi Parlamentar i Lëvizjes Vetëvendosje që nga data 15 prill e deri me 26 korrik kanë vepruar në përputhje të plotë me Kushtetutën, nëse marrim për bazë Aktgjykimin KO119/2014. Kushtetuta është e njëjta si në vitin 2014. Nuk ka ndryshuar”, ka shkruar Murati.
“Por ajo çfarë ka ndryshuar është interpretimi që po i bëjnë Kushtetutës anëtarët e Gjykatës Kushtetuese, sepse ka ndryshuar fituesi – tash është Lëvizja Vetëvendosje e nuk është PDK-ja”, ka thënë ai.
“Në fakt, ky Aktgjykimi i publikuar dje edhe duket sikur është shkruar në zyret e PDK-së, për dallim prej atij të datës 26 qershor që megjithatë linte përshtypjen se ka pasur kontribut edhe nga vetë Gjykata”, ka theksuar Murati.
