Kuvendi i Kosovës do të mblidhet sërish sot për të vazhduar seancën konstituive, në përpjekje për të zgjedhur kryetarin e ri.
Vazhdimi i kësaj seance vjen pas dështimit për të zgjedhur kryeparlamentarin të mërkurën, ku Lëvizja Vetëvendosje, si partia me më së shumti deputetë, propozoi fillimisht Albulena Haxhiun, e më pas Donika Gërvallën për kryetare të Kuvendit, por asnjëra prej tyre nuk arriti të sigurojë shumicën e nevojshme të votave për t’u zgjedhur.
Pas seancës, partitë politike iu kthyen akuzave ndaj njëra-tjetrës, shkruan gazeta online Reporteri.net.
Kryetari i Partisë Demokratike të Kosovës, Memli Krasniqi e ka përsëritur qëndrimin se kjo parti nuk do të votojë për kryeparlamentar asnjë nga deputetët që kanë qenë pjesë e Qeverisë Kurti.
“PDK siç ka thënë prej fillimit ne do të votojmë një kandidat të pranueshëm që nuk ka qenë pjesë e Qeverisë së Albin Kurtit. Nuk ka vota për Albulena Haxhiun. Nuk ka vota për askënd që ka qenë ministër. Unë emrat nuk ua imponojë Vetëvendosjes. Ta shohim çka sjellë seanca pasnesër.”, tha Krasniqi.
Ai tha se është e drejtë e Lëvizjes të propozoi këdo që do por do të ishte e drejtë që të propozohet dikush që mund të zgjidhet.
Krasniqi tha se ministrat e Kurtit “bashkërisht janë përgjegjës për degradimin dhe dëmtimin që i është bërë Kosovës”. Ai tha se LVV ka mjaftueshëm deputetë për të propozuar dhe nëse duan ta zgjedhin dikë nuk ka nevojë për taktizime.
Edhe kryetari i LDK-së, Lumir Abdixhiku, ka përsëritur qëndrimin e kësaj partie se ‘shumica nuk bëhet pa një marrëveshje politike’.
“Është e qartë se thelbi i problemit ka qenë te mungesa e shumicës. Përveç që kemi humbur plot 48 seanca rresht me shkelje Kushtetuese, në thelb të problemit kemi mungesën e shumicës, pra nuk ka numra. Partia që ka dalë e para, refuzon të bëj kompromis me partitë tjera që janë alternativë dhe rrjedhimisht kemi bllokadë.
LDK nuk është pjesë e ndonjë marrëveshje politike dhe nuk mbështet kandidat pa marrëveshje politike. Kemi humbur kohë shumë, kemi humbur ditë shumë”, tha Abdixhiku.
Ndërkaq, kryetari i AAK-së, Ramush Haradinaj, ka thënë se Lëvizja Vetëvendosja mund ta zhbllokojë procesin e konstituimit të Kuvendit.
Ai shtoi se sipas vlerësimit të AAK-së, rreth 20 deputetë të Vetëvendosjes do ta merrnin votën e AAK-së për postin e kryeparlamentarit.
“VV-ja i ka votat për kryetar Kuvendi. Sepse ne që kemi 5 vota të sigurta, plus ndonjë tjetër, sot do të votonim, ndoshta për 20 prej kandidaturave të VV-së. Pra i ka votat. VV-ja nuk i ka votat për qeveri, sepse për qeveri nuk votojmë, për Kurtin III jo. Kurti po do me shku në zgjedhje, por pa ardh në peshore. Nuk po don me u pa, duke mos i pas votat për ta bërë qeverinë. Ky është realiteti.
Në bindjen tonë si Aleancë janë rreth 20 njerëz të VV-së që ua qesim votën. Pra Kurti e ka votën për kryetar Kuvendi kur do, nesër”, ka thënë Haradinaj në Debat Plus.
Ndërkaq nga VV-ja akuzuan PDK-në, LDK-në dhe AAK-në se po duan ta kthejnë në pushtet Listën Serbe.
E propozuara e Lëvizjes Vetëvendosje për kryeparlamentare, Albulena Haxhiu tha se propozimi për Donika Gërvalla u bë pasi ajo është gruaja e dytë më e votuar në zgjedhjet e 9 shkurtit.
Sipas deputetes së VV-së, me dje konfirmua se problem s’ka qenë emri i saj, por vetë VV-ja.
“Propozimi i dytë i Vetëvendosjes ishte Donika Gërvalla dhe ne nuk e propozuam vetëm rastësisht. Donika Gërvalla së pari është gruaja e dytë më e votuar në zgjedhjet e 9 shkurtit dhe besoj që kjo duhet të këtë rëndësi për të gjithë, sepse janë votat e qytetarëve që kanë përcaktuar këtë rezultat. Është zëvendëskryeministre, është person jashtëzakonisht i rëndësishëm, sepse me Donikën ne kemi pasur një partneritet të shkëlqyer, një bashkëpunim tepër të mirë. Për ne kjo ka shumë rëndësi, siç e kanë përmendur edhe përfaqësuesit e Vetëvendosjes ne menduam se do të kalojë ky propozim. Mirëpo, ja që opozita nuk dëshiron që të ndryshojë qëndrimin. Besoj që kurdo që ndodhin zgjedhjet e jashtëzakonshme do ta marrin goditjen e qytetarëve të Kosovës”, tha ajo.
Më vonë reagoi edhe e propozuara tjetër e Lëvizjes Vetëvendosje për kryeparlamentare, Donika Gërvalla.
Ajo ka publikuar një shprehje të babait të saj, veprimtarit Jusuf Gërvallës.
“E thënë me fjalët e poetit: “Rruga e nderës asht ma e zorshmja, po ma e mira dhe e vetmja rrugë e vërtetë për njeriun. Dhe, kush u mundue për nder, nder ka gjetë!””, ka shkruar Gërvalla.
Akuza pati edhe deputeti i VV-së, Hekuran Murati.
Murati tha se fakti që e sollën një emër të ri si propozim dhe nuk mori votat e mjaftueshme, dëshmon për taktikat bllokuese të partive ish opozitare ndaj institucionit të Kuvendit.
“Ne propozuam Haxhiun, thanë duhet ta ndërroni. Dhe deri më sot disa mund të kenë besuar që opozita e ka të sinqertë që nëse ndërrohet kandidati, mund të votohet Haxhiu. Por kur propozuam Gërvallën, ndodhi e njëjta gjë. Kjo është dëshmia më e mirë që kemi të bëjmë me taktika bllokuese ndaj institucionit të Kuvendit. Synimi i tyre është që ta kthejnë një qeverisje të vitit 2019, kur ka qenë edhe Lista Serbe. E shihni që koalicioni i tyre funksionon në mënyrë perfekte. Por populli i njeh dhe nuk ua ka dhënë votat”, tha Murati.
