Komuna e Gjilanit, e udhëhequr nga Alban Hyseni i VV’së, ka vazhduar me avazin e nepotizmit… Rehatimin e familjarëve me pozita publike. Rezultatet e konkursit të radhës për mësimdhënës, ku dy kandidatë të pranuar kanë ngjallur dyshime për konflikt interesi. Njëra fituese është bashkëshortja e një ish-kryesuesi të Kuvendit Komunal dhe themelues i VV-së në Gjilan, ndërsa tjetri dyshohet se ka lidhje familjare, apo më saktë kunati i një drejtoreshe komunale. Insajderi sjell detaje.
Komuna e Gjilanit me 22 qershor kishte hapur konkurs për mësimdhënës lëndor, në shkolla të ndryshme të kësaj komune.
Kandidatët që kanë aplikuar i janë nënshtruar testit me shkrim, dhe gojë.
Numri i kandidatëve që kanë përfunduar me sukses testin me shkrim, ka qenë thuajse i madh. Të njëjtin kanë vazhduar për testimin me gojë.
E para në listë që kishte arritur pikët e testit me shkrim, kishte qenë Elmaze Rexhepi Sadiku.
Ndërkohë pas përfundimit të testit me gojë, janë zgjedhur kandidatët fitues. Elmaze Rexhepi Sadiku edhe në listën fituese ka dal e para, për lëndën Gjeografi në SHFMU Abaz Ajeti”.
Ajo ka arritur gjithsej 85 pikë.
Në listë është edhe kandidati Xhelil Haziri, i cili është pranuar për lëndën ‘Lëndë ekonomike’ SHML Memet Isai”.
Haziri ka arritur 71.2 pikë.
Kush janë dy kandidatët e zgjedhur për këto pozita, dhe çka i lidh me pushtetin në Gjilan?
Elmaze Rexhepi Sadiku është bashkëshortja e Arianit Sadikut nga Gjilani.
Arianit Sadiku ka qenë ish kryesues i Kuvendit Komunal në komunën e Gjilanit, e udhëhequr nga Alban Hyseni i Vetëvendosjes.
Jo vetëm, Sadiku është edhe një nga themeluesit e Lëvizjes Vetëvendosje dhe hapjen e Qendrës së saj në Gjilan, më 20 gusht 2005.
Këtë e ka treguar ai edhe vetë përmes një postimi në profilin e tij në Facebook.
Arianit Sadiku në të kaluarën kishte qenë edhe kandidat për asamble nga Lëvizja Vetëvendosje në Gjilan.
Mbështetje kishte marrë edhe nga gruaja e tij, Elmaze Rexhepi Sadiku.
“Me kandidatin për asamble, me mendje e me zemër 10, Arianit Sadiku 5″, kishte shkruar ajo, në vitin 2017.
Gazeta Insajderi ka tentuar të kontaktojë me Elmaze Rexhepi Sadiku, dhe me bashkëshortin e saj Arianit Sadikun, se a ka pas ndonjë konflikt interesi në punësimin e saj, mirë të njëjtin deri në publikimin e këtij teksti nuk kanë kthyer përgjigje.
Ndërkohë dyshohet se kandidati tjetër, Xhelil Haziri, i cili është pranuar për lëndën ‘Lëndë ekonomike’ SHML Memet Isai”, është familjar i Drejtoreshës Komunale të Gjilanit, Arbenita Sopi Haziri.
Siç kanë raportuar mediat komunale, dyshohet se Xhelil Haziri është kunati i drejtoreshës së Administratës Komunale në Gjilan, Arbenita Sopi Haziri.
Gazeta Insajderi ka tentuar të marrë një konfirmim nga drejtoresha Arbenita Sopi Haziri, por e njëjta deri në publikimin e këtij tekstit nuk ka kthyer përgjigje.
Insajderi ka dërguar pyetje edhe në komunën e Gjilanit rreth këtyre punësimeve por që nuk i janë përgjigjur redaksisë.
