Ish-asamblisti i Lëvizjes Vetëvendosje në Prishtinë, Besnik Mujeci, i arrestuar para dy vitesh në Shqipëri pasi u zë me 11 mijë doza esktazi në vlerë prej 400 mijë eurosh, është liruar me kusht nga Gjykata në Shqipëri.
Siç raporton “Koha.net”, Mujeci është liruar në periudhë prove katër vjeçare.
“Lënien në fuqi të vendimit Nr.3114, datë 26.12.2024 të Gjykatës së Shkallës së Parë të Juridiksionit të Përgjithshëm Tiranë, me këtë ndryshim: Bazuar në nenin 59 të Kodit Penal, pezullimin e ekzekutimit të dënimit me burgim dhe vënien në provë të të pandehurit Mithat Ramadani, për një periudhë prej 4 (katër) vjet. – Bazuar në nenin 59 të Kodit Penal, pezullimin e ekzekutimit të dënimit me burgim dhe vënien në provë të të pandehurit Besnik Mujeci, për një periudhë prej 4 (katër) vjet. – Urdhërohen të pandehurit të mbajnë kontakte me shërbimin e provës. – Urdhërohet lirimi i menjëhershëm i të pandehurve Mithat Ramadani dhe Besnik Mujeci, nëse nuk mbahen për shkaqe të tjera të ligjshme”, thuhet në vendim.
Kundër këtij vendimi mund të parashtrohet ankesë në Gjykatën e Lartë brenda 45 ditëve nga marrja e njoftimit të vendimit.
