Kuvendi i Kosovës sot ka zgjedhur kryetarin e ri, por procesi i konstituimit u bllokua në fazën e zgjedhjes së nënkryetarit nga komuniteti serb. Pas tri tentimeve radhazi të Listës Serbe për ta propozuar të njëjtin kandidat, kryesuesi i seancës, Dimal Basha, vendosi që kjo pozitë të procedohet përmes shortit.
Ai u mbështet në aktgjykimin e Gjykatës Kushtetuese, ku theksohet se i njëjti kandidat mund të propozohet maksimumi tre herë. Mirëpo, kjo ishte e njëjta gjykatë të cilën Basha, më 8 gusht, e kishte akuzuar se “i shërben grupeve të interesit” dhe jo drejtësisë, duke e quajtur vendimin e saj “të turpshëm”.
Megjithatë, në seancën e sotme ai e interpretoi dhe e zbatoi këtë aktgjykim, duke i kërkuar Listës Serbe që të propozonte një kandidat tjetër.
“Gjykata Kushtetuese ka përcaktuar qartë se një emër mund të dorëzohet vetëm tri herë. Prandaj, në frymën e këtij vendimi, ju ftoj të vini me një kandidat tjetër”, u shpreh Basha.
Pavarësisht kësaj, Lista Serbe vazhdoi me të njëjtin propozim, duke e çuar procesin drejt ngërçit. Në këtë situatë, Basha vendosi të zbatojë opsionin e shortit, vendim që sipas juristëve mund të shihet si shkelje e Kushtetutës në një aspekt tjetër.
‘Vendimin e turpshëm’ siç e quajti Basha atë ditë, sot e interpretoi dhe e zbatoi, duke thënë se vetëm tri herë Simiq duhet të votohet, sepse ashtu ka vendosur Kushtetuesja.
“I nderuar përfaqësues nga komuniteti serb, në frymën e aktgjykimit të Gjykatës Kushtetuese, gjykata na ka thënë të qartë që lejohet vetëm tri herë që të propozohet një kandidat. Prandaj, në të njëjtën frymë, ju ftoj të propozoni një kandidat tjetër. “
“Siç e dini, aktgjykimi i Gjykatës Kushtetuese për me dalë nga ngërçi, një prej arsyeve ka qenë propozimi i të njëjtit kandidat radhazi. Gjykata ën frymën e daljes nga ngërçi, bllokimi, i Kuvendit, ka propozu që emërimet të propozohen vetëm tri herë. Kjo vlenë për kryetarin dhe nënkryetarët” =m deklaroi Basha, teksa Lista Serbe vazhdonte me propozimin e njëjtë.
