Kreu i sigurisë kombëtare të Iranit, Mohammad Bagher Zolghadr, ka paraqitur një listë kërkesash që SHBA-ja duhet t’i përmbushë përpara se Irani të rihapë ngushticën e Hormuzit.
Mediat shtetërore publikuan listën e kërkesave të Zolghadrit, sekretar i Këshillit të Lartë të Sigurisë Kombëtare. Lista përfshin masa si heqjen e bllokadës detare amerikane, tërheqjen e forcave ushtarake dhe përfundimin e përhershëm të luftës, raporton CNN.
Zolghadr kërkon gjithashtu që SHBA-ja ta kompensojë Iranin për dëmet e shkaktuara nga konflikti dhe të lirojë asetet iraniane të ngrira.
“Këto janë kërkesat e popullit iranian, të cilat ata i kanë shprehur fuqishëm gjatë 160 ditëve të qëndrimit të palëkundur në terren dhe në rrugë”, tha politikani.
“Derisa Amerika të korrigjojë sjelljen e saj, ngushtica e Hormuzit nuk do të rihapet”, thuhej në deklaratën e tij.
Pak kontekst: Më herët të shtunën, ministri i Jashtëm i Iranit, Abbas Araghchi, tha se Irani është “shumë pranë” arritjes së një marrëveshjeje me Omanin për menaxhimin e ngushticës së Hormuzit.
Megjithatë, ai paralajmëroi se rihapja e ngushticës është “e kushtëzuar nga kushte të tjera”, përfshirë kërkesën që SHBA-ja të ndreqë atë që ai e cilësoi si shkelje të memorandumit të mirëkuptimit të dakorduar mes dy vendeve në qershor.
Ministria e Jashtme e Omanit i përshkroi negociatat si “pozitive dhe konstruktive”.
Të premten, transmetuesi shtetëror iranian, Islamic Republic of Iran Broadcasting (IRIB), raportoi se ligjvënësit iranianë në masë të madhe kishin rënë dakord për një kornizë të propozuar të marrëveshjes me Omanin, por po prisnin “miratimin përfundimtar”.
