Gjykata Supreme ia ka refuzuar ankesën kandidatit të PDK’së për Kryetar të Deçanit, Korab Mushkolajt, ndaj vendimit të Panelit Zgjedhor për Ankesa dhe Parashtresa.
Ai ishte ankuar në PZAP pas refuzimit për certifikim për pjesëmarrje në zgjedhjet lokale të 12 tetorit nga ana e Komisionit Qendror të Zgjedhjeve.
“Kolegji i Gjykatës Supreme e ka refuzuar si të pabazuar ankesën administrative të parashtruesit Korab Mushkolaj nga Komuna e Deçanit, kandidat i propozuar nga Partia Demokratike e Kosovës për Kryetar të Komunës së Deçanit, e paraqitur kundër Vendimit të Panelit Zgjedhor për Ankesa dhe Parashtresa (PZAP), me numër A.nr.4/2025, pas vendimit të Komisionit Qendror të Zgjedhjeve (KQZ), për shkak të refuzimit për certifikim të kandidatit, për pjesëmarrje në Zgjedhjet Lokale të Republikës së Kosovës, që do të mbahen me datë 12 tetor 2025”, thuhet në njoftim.
Në vendimin e Supremes, thuhet se “ankuesi, me pretendimet ankimore, nuk ka arritur që të vë në dyshim vendimin e ankimuar të PZAP-it, i cili, për arsyet e sipër cekura, është i drejtë dhe i ligjshëm, andaj, kjo Gjykatë, ankesën e parashtruar nga paraqitësi i sipër përmendur, kundër vendimit të kontestuar e refuzoi si të pa themeltë.”
Vendimi i PZAP-së erdhi pas refuzimit të mëhershëm nga Komisioni Qendror i Zgjedhjeve (KQZ), i cili bazoi qëndrimin e tij në opinionin e Ministrisë së Punëve të Jashtme.
Sipas këtij institucioni, Mushkolaj është ende i angazhuar me aktemërim të përhershëm si zyrtar i lartë në Divizionin e Ceremonialit të Departamentit të Protokollit të Shtetit – një pozitë që konsiderohet si pjesë e Shërbimit të Jashtëm dhe përfaqësimit diplomatik të Kosovës.
Ligji aktual ndalon kandidimin e personave që janë pjesë e Shërbimit të Jashtëm për pozita publike përfaqësuese.
