Marko Pusevac, një student nga Beogradi, në vitin 2021 ia kishte mësyrë studimeve Master në universitetin e kryeqendrës serbe. Tema që ai kishte paraqitur para profesorëve titullohej ‘Dimensioni fetar i terrorizmit shqiptar në Kosovë dhe Metohi’, ku si burim kishte përdorur edhe literaturën e Dimal Bashës.
DOKUMENT:
Artikulimi nga studenti që përdorte për referencë punimet e Bashës i ngjante më shumë artikujve ekstrem propagandistik të aparatit shtetëror serb mbi ngjarjet historike në Kosovë, sesa një punimi akademik. Aty ai e cilësonte si “terroriste” luftën për çlirim të UÇK-së. Thoshte se Kosova, “pas përpjekjes për shkëputje nga Jugosllavia, ishte bërë bastion i narko-terroristëve”.
DOKUMENT:
”…ideja e shkëputjes së Kosovës e Metohisë shfaqet gjatë viteve 1970. E gjithë kjo zgjati deri në bombardimin e Republikës Federale të Jugosllavisë-së në vitin 1999, kur terrorizmi nga ekstremistët shqiptarë u përshkallëzua ashtu si dhe agresioni ushtarak kundër Jugosllavisë dhe Serbisë. Kulmi në realizimin e ideologjisë irredentiste shqiptare u arrit në vitin 1999, kur terrorizmi nga ekstremistët shqiptarë u përshkallëzua. Aktivitetet terroriste kanë marrë përmasa të mëdha, deri në atë masë sa ato kanë karakteristikat e një kryengritjeje të armatosur kundër rendit kushtetues dhe sigurisë së Republikës së Serbisë dhe Republikës Federale të Jugosllavisë. Pas përpjekjes për shkëputje nga Republika e Serbisë, Kosova* është bërë një bastion i narko-terroristëve”, shkruante mes tjerash, në temën e tij për Master, ky student nga Beogradi.
DOKUMENT:
Ndryshe nga Beogradi, në Kosovë për punimin e Dimal Bashës nuk dihej deri të mërkurën e kësaj jave, 24 orë pasi ai zgjedhej Kryetar i Kuvendit të Kosovës. Atë ditë në mbrëmje, në media dolën raportimet për një punim akademik të tij, i publikuar më 22 gusht 2012, ku në bashkëautorësi shkruante se Ushtria Çlirimtare e Kosovës (UÇK), bashkëpunoi me kriminelë brenda dhe jashtë Kosovës.
“Ka pasur akuza të shumta nga agjencitë perëndimore të zbatimit të ligjit se Ushtria Çlirimtare e Kosovës (UÇK), gjatë ngritjes së saj, bashkëpunoi me kriminelë shqiptarë etnikë brenda dhe jashtë Kosovës”, shkruante Basha në këtë punim, të realizuar bashkë me maqedonasen Jana Arsovska.
Basha shkruante se “fondet për UÇK-në vinin nga shqiptarë të zakonshëm në diasporë, si dhe nga trafikantë droge që vepronin në të gjithë Evropën Perëndimore dhe SHBA-në”.
“Kjo mbështetje nuk kufizohej vetëm në para, por trafikantët e drogës dërgonin gjithashtu njerëz të armatosur për të luftuar përkrah UÇK-së dhe blinin armë në emër të UÇK-së”, shkruante ai. /Voxkosova.com/Veriu.info
