Muhamet Hamiti nga Lidhja Demokratike e Kosovës ka akuzuar kryeministrin në detyrë Albin Kurti se po e keqpërdor fuqinë që mori nga zgjedhjet e 9 shkurtit për të bllokuar funksionimin kushtetues të institucioneve të vendit.
Sipas Hamitit, Kurti në fushatë kërkoi 500 mijë vota pa ofruar program qeverisës dhe as pas shtatë muajsh nuk ka prezantuar një të tillë.
“M’i jepni 500 mijë vota, thoshte Albin Kurti, pa ofruar program. As 7 muaj mbas zgjedhjeve nacionale të shkurtit kurrë program s’ka përmendur. Nuk e kam premtuar, do të mund të thoshte. Punë dhe drejtësi ka pasë premtuar më 2021. Bëri punësime nepotiste dhe partiake, bëri korrupsion masiv qeveritar, i shkeli pamëshirshëm Kushtetutën dhe ligjet e Kosovës. E bëri të kundërtën e asaj që e kishte premtuar, siç i ka hije demagogut populist”, ka shkruar ai.
Ai shton se Kurti, me votat e marra sivjet, po e mban vendin në krizë institucionale.
“Me votat që i mori sivjet, Albin Kurti ia doli ta bllokojë funksionimin kushtetues të institucioneve: nuk ka Kuvend të konstituuar, nuk ka Qeveri me mandat të plotë. Po sundon lideri i VV-së në kundërshtim me normat demokratike, me Kushtetutën e Kosovës, të cilën e shkel për qejfi”.
Hamiti thotë se Kurti dhe Vetëvendosje po e rrezikojnë rendin demokratik dhe kushtetues të Kosovës, ndërsa kritikoi edhe propagandën e mbështetësve të tij.
“Ndërkohë, sejmenët e tij partiakë dhe medialë, sikur edhe Kurti vetë, vazhdojnë t’i fajësojnë qeveritë e mëhershme për dështimet e tij. As sanksionet e BE-së që ia solli Kurti Kosovës nuk u bëjnë përshtypje. As Marrëveshja e Brukselit për vetëmenaxhimin e serbëve në Kosovë që e pranoi Kurti. Albin Kurti me VV-në e tij, por edhe partnerët që janë rreshtuar me ta, po e rrezikojnë rendin demokratik dhe kushtetues të Kosovës. Po e rrezikojnë shtetin”.
