Biznesmeni Hashim Rexhepi është vendosur në masën e paraburgimit pas ngjarjes tragjike të 29 gushtit 2025, kur e reja Lindore Sejdiu humbi jetën në një poligon qitjeje në Prishtinë.
Vendimi i Gjykatës është kundërshtuar nga mbrojtja, e përfaqësuar nga avokatja Besjana Ismaili. Në dokumentin e siguruar nga Gazeta Insajderi, avokatja Ismaili thekson se Prokuroria ka gabuar në interpretimin e fakteve dhe të ligjit, duke e trajtuar një rast të vetëvrasjes si përgjegjësi penale të klientit të saj.
“Në asnjë vend të kërkesës së Prokurorisë nuk shihet se i mbrojturi im ka ndërmarrë ndonjë veprim me dashje. Përkundrazi, nga pamjet e siguruara shihet qartë se kemi të bëjmë me vetëvrasje, e jo me manovrim të armës sikurse pretendohet. Kjo është një ngjarje fatale dhe e dhimbshme, por jo vepër penale e Hashim Rexhepit,” tha Ismaili para trupit gjykues.
Ajo argumentoi se Prokuroria nuk ka sjellë prova konkrete që ta mbështesin dyshimin e bazuar për përgjegjësi të Rexhepit.
“I mbrojturi im ishte i pari që thirri policinë dhe ndihmën e shpejtë menjëherë pas ngjarjes. Nuk ekziston asnjë provë që ai ka tentuar të ndikojë tek dëshmitarët ose të pengojë hetimin”, shtoi ajo.
Ismaili kujtoi se edhe sipas Kodit të Procedurës Penale, paraburgimi është masa më e rëndë dhe duhet të përdoret vetëm kur nuk ka alternativë tjetër.
“Gjykata ka mundësi ligjore të caktojë masa më të buta, si arresti shtëpiak. Në këtë rast nuk ekziston asnjë rrezik që i mbrojturi im të arratiset apo të ndikojë tek provat, prandaj paraburgimi është i panevojshëm,” tha ajo.
Në mbështetje të argumenteve të saj, Ismaili solli edhe shembuj nga marrëdhëniet mes dy familjeve, duke theksuar se nuk ka pasur armiqësi mes tyre.
“Familja Sejdiu e ka mirëpritur pjesëmarrjen e familjes Rexhepi në varrim. Kjo tregon se nuk kemi të bëjmë me ndonjë konflikt, por me një tragjedi të rëndë personale dhe shoqërore”. tha ajo.
