Gjykata Supreme e Kosovës ka reaguar ashpër ndaj deklaratave të anëtarit të Komisionit Qendror të Zgjedhjeve (KQZ), Alban Krasniqi, nga radhët e Lëvizjes Vetëvendosje, të bëra gjatë mbledhjes së këtij institucioni, sot.
Gjykata Supreme shpreh shqetësim të thellë lidhur me atë që e cilëson si “sulm të drejtpërdrejtë ndaj integritetit të një gjyqtari dhe sistemit të drejtësisë në Kosovë”.
Sipas deklaratës, Krasniqi ka përdorur “gjuhë të papranueshme” ndaj gjyqtarit të kësaj gjykate, Zenel Leku, si dhe ka bërë krahasime dhe deklarata që synojnë dëmtimin e figurës së tij.
“Gjykata Supreme dënon ashpër këtë gjuhë reagimi të paprecedent dhe konsideron se deklaratat e tilla, përveçse janë të papranueshme, përbëjnë tentativë për të minuar besimin në drejtësi”, thuhet në reagim.
Më tej, Gjykata thekson se përdorimi i etiketimeve, teorive konspirative dhe përpjekjeve për denigrim të gjyqtarëve në një institucion si KQZ “tregon mungesë të kulturës politike dhe respektit institucional”.
“Qytetarët e Kosovës kanë nevojë për përfaqësues që i respektojnë institucionet, jo për ata që përpiqen t’i delegjitimojnë ato me akuza pa fakte”, vijon reagimi.
Në përfundim, Gjykata Supreme rikujton se vendimet e saj bazohen në Kushtetutë dhe ligj, dhe se nuk do të shërbejë kurrë për interesa politike ditore.
