Kryetari i Drenasit, Ramiz Lladrovci, ka reaguar ndaj një deklarate të ish-deputetit të PDK-së, Xhavit Haliti, lidhur me fondin “Vendlindja Thërret”, i cili grumbullonte para nga diaspora për luftën në Kosovë.
Duke folur në një intervistë për Kanal 10, Lladrovci ironizoi me pretendimet e Halitit, duke theksuar se fondet ishin menaxhuar në mënyrë të rregullt dhe transparente nga vetë ai dhe bashkëpunëtorët e tij.
“E dini bre, shqiptarët e Detroitit (SHBA) i kanë pru mbi 100 mijë dollarë. I kemi numëruar një nga një, dollar për dollar. Ata vetë na kanë thënë se të tjerët i “gjuni qatje”, ka thënë ai.
Lladrovci shtoi se për çdo cent është mbajtur raport dhe është dhënë llogari.
“Kemi pas raport për çdo cent dhe kemi dhënë llogari. Pas çlirimit e kemi mbajtur mbledhjen përmbyllëse dhe kemi përfunduar misionin e lëvizjes.”
Ai gjithashtu përmendi se grupe të tjera, pa përmendur emra, i “gjuanin paratë” që diaspora i dërgonte për luftën, duke aluduar në keqmenaxhime apo mungesë transparence nga të tjerët. /Indeksonline/
