Komisioni Qendror i Zgjedhjeve mbajti mbledhjen e 54-të në këtë vit, të kryesuar nga kryesuesi, Kreshnik Radoniqi.
Në pikën e parë të rendit të ditës, KQZ mori vendim për decertifikimin e 9 kandidatëve nga subjekte të ndryshme politike, si: Prishtina në dorën tënde (1); Partia Demokratike e Kosovës (1); Lëvizja për Bashkimin e Shqiptarëve (1); Partia Liberale Egjitpiane (2) dhe Alternativa (4). Këta kandidatë, ishin certifikuar më herët nga KQZ për pjesëmarrje në Zgjedhjet Lokale, të cilat do të mbahen më 12 tetor 2025.
Në këtë mbledhje, KQZ mori vendim për miratimin e procedurës standarde të veprimit për votimin jashtë Kosovës dhe vlerësimin e pakove me fletëvotime. Ky dokument ka për qëllim të përshkruajë të gjitha veprimet për përgatitjen e materialeve për votimin jashtë Kosovës.
Sipas Rregullës Zgjedhore për regjistrimin dhe votimin jashtë Kosovës KQZ do të sigurohet që shtetasve të Kosovës të regjistruar për votim me postë t’ua dërgojë përmes postës pakon me fletëvotime, andaj kjo procedurë parasheh që zarfi i dërguar nga KQZ përmes postës të pranohet vetëm nga personi i regjistruar. Zyrtari i postës duhet të sigurohet që të kontrollojë përmes dokumentit identifikues personin për të cilin është i dedikuar zarfi/pako me fletëvotime.
Zarfi i cili do t’i dërghet votuesit, përmban: fletëvotimet; zarfin e fshehtësisë; udhëzuesin me informacione se si plotësohen fletëvotimet dhe si realizohet votimi përmes postës; zarfin kthyes dhe shiritin mbyllës. Në votimin jashtë Kosovës për votim me postë në Zgjedhjet Lokale, detyrë e votuesit është që pakon me fletëvotime ta dërgojë në ndonjërën nga kutitë postare të KQZ-së që hapen në shtete të ndryshme.
Adresat e kutive postare do të publikohen nga KQZ para fillimit të periudhës së votimit me postë.
Në pikën tjetër të rendit të ditës, KQZ mori vendim për miratimin e rekomandimit të Komisionit për Kundërshtim Administrativ, i cili ka shqyrtuar ankesat e aplikuesve që janë refuzuar për t’u regjistruar si votues jashtë Kosovës për votim me postë në Zgjedhjet Lokale 2025. Numri i përgjithshëm i kundërshtimve të paraqitura breda afatit në komisionin e formuar nga KQZ, është 275, prej të cilave:
· 174 aplikuesve u refuzohet kërkesa për kundërshtim administrativ pasi nuk kanë paraqitur kundërshtimin sipas procedurës për të cilën janë njoftuar;
· 77 ankesa janë apovuar pasi aplikuesit kanë bashkëngjitur dokumentet që kërkoheshin dhe
· 24 shtetas janë rikthyer në Listën Votuese brenda Kosovës pas kërkesës të tyre për anulimin e regjistrimit për votim jashtë vendit.
