Ish kryeministri Isa Mustafa, ka komentuar masën e përkohshme të vendosur nga Gjykata Kushtetuese që ndalon çfarëdo veprimi drejt krijimit të institucioneve të reja, raporton GazetaBlic.
Mustafa në një prononcim për GazetaBlic, thotë se kjo ka qenë e pritshme por problemi sipas tij qëndron në veprimet dhe sjelljet që sollën te kjo masë dhe te stërgjatja e pafund për konstituimin e Kuvendit.
“Vlerësoj se nuk është çështje masa e përkohshme, sepse ka qenë e pritshme. Problem janë veprimet dhe sjelljet që sollën te kjo masë dhe te stërzgjatja e pafund e konstituimit të Kuvendit dhe e formimit të institucioneve”, tha ai.
Tutje ai thekson se çdo ditë në këtë gjendje është ditë e abuzimit me pushtetin dhe demokracinë dhe se kjo situatë krijon mundësi për shpërfaqjen e papërgjegjshmërisë profesionale dhe politike nga ata që pretendojnë se kanë njohuri dhe kompetenca në fushën kushtetuese.
Mustafa shprehet se asnjëherë më parë nuk është bërë lëmsh Kushtetuta dhe nuk është sfiduar Gjykata Kushtetuese si kësaj radhe për shkak të papërgjegjësive politike.
“Çdo ditë në këtë gjendje është ditë e abuzimit me pushtetin dhe demokracinë. Dhe çdo ditë e një gjendje të tillë do të jetë hapësirë e shpërfaqjes së papërgjegjshme profesionale e politike të interpretimeve kushtetuese nga disa që po thirren në dije dhe kompetenca të fushës kushtetuese dhe nga disa që pretendojnë se dijnë. Asnjëherë nuk është bërë lëmsh Kushtetuta dhe nuk është sfiduar Gjykata Kushtetuese si kësaj radhe për shkak të papërgjegjësive politike”, përfundoi ai.
