Kryetari i Kuvendit të Kosovës, Dimal Basha, ka përkujtuar viktimat e sulmit terrorist të 11 Shtatorit 2001 që kishte ndodhur në New York të Shteteve të Bashkuara të Amerikës.
Përmes një postimi në Facebook, Basha ka thënë se sulmi i 11 shtatorit 2001 ishte sulm ndaj vlerave të lirisë dhe demokracisë.
“Sulmi në New York ishte sulm kundër vlerave të lirisë dhe demokracisë, prandaj 11 shtatori mbetet një kujtesë e përhershme se bota duhet të qëndrojë e bashkuar kundër terrorizmit dhe ekstremizmit të çfarëdo forme që cenon këto vlera. Sot, 24 vjet më pas, përkujtojmë viktimat dhe shprehim solidaritet me familjet e tyre, si dhe nderojmë heroizimin e policëve, zjarrfikësve dhe të gjithë tjerëve që sakrifikuan veten për të shpëtuar të tjerët”, ka shkruar ai.
Ai tutje përmendi edhe tre shqiptarët që humbën jetën në këtë sulm: Simon Dedvukaj, Mon Gjonbalaj dhe Rrok Camaj.
Basha ka shtuar se në këtë ditë përkujtimi, populli i Kosovës qëndron krah për krah me popullin amerikan ‘duke ndarë dhimbjen dhe duke ripohuar solidaritetin dhe mirënjohjen tonë për miqësinë e pazëvendësueshme që kemi me Shtetet e Bashkuara.
