Ish-prokurori special, Ali Rexha është ndaluar për 48 orë nën dyshimet se ka kërcënuar Prokurorin në Zyrën e Kryeprokurorit të Shtetit, Lulzim Sulejmanin.
Kështu kanë bërë të ditur burimet e Sinjalit brenda Prokurorisë dhe kanë njoftuar se Rexha do të hetohet për veprën penale kanosje.
Ndryshe lidhur me këtë rast ka reaguar edhe Këshilli Prokurorial i Kosovës, me ç’rast ka dënuar fuqishëm kërcënimin ndaj Prokurorit Sulejmani.
Në komunikatën për media, KPK thotë se këto kërcënime serioze ndaj Prokurorit Sulejmani, janë si rrjedhojë e angazhimeve të prokurorit në kuadër të aktiviteteve të tij në proceset disiplinore, të realizuara kohë më parë, ndaj ish-prokurorit special, Ali Rexha.
“Këshilli Prokurorial qëndron fuqishëm në përkrahje të prokurorit Lulzim Sulejmani dhe ofron mbështetje të plotë në punën e tij gjatë ushtrimit të funksionit si Prokuror i Shtetit”, thuhet në komunikatë.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
