Pentagoni të martën konfirmoi se disa zyrtarë ushtarakë amerikanë i vëzhguan ushtrimet e përbashkëta ushtarake mes Rusisë dhe Bjellorusisë të hënën, duke e pranuar ftesën për herë të parë që nga fillimi i pushtimit të plotë rus të Ukrainës më 2022.
Të hënën, agjencia e lajmeve “Reuters” dhe media të tjerë fotografuan zyrtarë ushtarakë amerikanë në Bjellorusi duke e përcjellë ushtrimin “Zapad-2025” bashkë me vëzhgues të shteteve të tjera. Bjellorusia është aleate e palëkundur e Rusisë dhe shërbeu si vendnisje për pushtimin e plotë rus të Ukrainës.
Zëvendësministri i Mbrojtjes i Rusisë, Yunus-Bek Yevkurov, gjithashtu i përcolli nga afër ushtrimet në Bjellorusi, raporton agjencia e lajmeve “Reuters”.
“Ambasada e ShBA-së në Minsk të Bjellorusisë mori një ftesë për atasheun tonë të mbrojtjes për të marrë pjesë në ushtrimin ushtarak Zapad-2025 në Bjellorusi si pjesë e Ditës së Vizitorit të Dalluar dhe ne e pranuam ftesën pas angazhimeve dypalëshe produktive rishtazi mes vendeve tona” – tha zëdhënësi kryesor i Pentagonit, Sean Parnell.
Prania e oficerëve amerikanë, më pak se një javë pasi Polonia fqinje rrëzoi dronë rusë që hynë në hapësirën e saj ajrore, është shenja më e re se Uashingtoni po e synon ngrohjen e marrëdhënieve me Bjellorusinë.
Analistët perëndimorë të politikës së jashtme besojnë se Trumpi mund të jetë duke u përpjekur që ta largojë Bjellorusinë nga Rusia, strategji që gjerësisht shihet me pak gjasa për sukses, ose që t’i shfrytëzojë lidhjet e saj të ngushta me Moskën për të promovuar një marrëveshje për përfundimin e luftës në Ukrainë.
Trumpi, i cili ka sugjeruar se hyrja e dronëve në Poloni mund të ketë qenë rezultat i një gabimi, javën e kaluar ia hoqi sanksionet kompanisë ajrore shtetërore të Bjellorusisë, “Belavia”, duke ia mundësuar servisimin dhe blerjen e pjesëve për aeroplanët e saj, në mesin e të cilëve ka edhe të prodhuesit “Boeing”.
Presidenti amerikan e mori këtë vendim pasi homologu i tij bjellorus, Aleksander Lukashenko, u pajtua që të lironte 52 të burgosur, përfshirë disa gazetarë e kundërshtarë politikë.
