Paneli Zgjedhor për Ankesa dhe Parashtresa ka refuzuar si të pabazuar ankesën e Listës Serbe ndaj Lëvizjes Vetëvendosje për shkelje të Kodit të Mirësjelljes gjatë fushatës zgjedhore.
Lista Serbe u ankua në PZAP me arsyetimin se LVV ka paraqitur ankesë të pabazuar në Panel kundër këtij subjekti politik.
Kjo parti politike, mes tjerash ka deklaruar se në ankesën e saj, LVV nuk ka paraqitur fakte por trillime.
Sipas këtij subjekti politik, Lëvizja Vetëvendosje ka abuzuar me të drejtën për ankesë.
Në përgjigjen e saj, LVV kishte pretenduar se ankesa e datës 15.09.2025 (e cila u refuzua si e pabazuar nga PZAP), kishte të bëjë me thirrjen e dëgjuar gjatë hapjes së fushatës nga LS, e cila ishte “Svi za brata Milan”(Të gjithë për vëlla Milanin), duke pretenduar se ishte thirrje përkrahje për Milan Radoiçiqin.
Kjo parti kishte shtuar se me përkrahjen ndaj Radoiçiqit, nxitet urrejtja dhe glorifikohet një person i shpallur në kërkim, prandaj edhe ankesa ishte veprim i justifikuar.
LVV i ka thënë PZAP-së se ankesa e Listës Serbe është e pabazuar në Ligj dhe Prova.
PZAP ka ardh në përfundim se pretendimet e LS-së janë të paqëndrueshme dhe se çdo subjekt ka të drejtë ankese kur supozon se i janë shkelur apo cenuar të drejtat gjatë fushatës zgjedhore.
Vendimin e plotë të PZAP-së mund ta lexoni në këtë vegëz.
