Juristi James Williams po e vazhdon dëshminë e tij në Hagë, si dëshmitar i mbrojtjes së Hashim Thaçit, në rastin Thaçi dhe të tjerët.
Ai është pyetur se pse, Hashim Thaçi është larguar nga kështjella ku po mbahej takimi i Rambujesë dhe ka shkuar ta takoj Adem Demaçin, për çka ka thënë se i duhej mbështetja e tij për nënshkrimin e marrëveshjes.
“Dinamika në Rambuje ishte, që delegacioni i Kosovës përfshirë këtu edhe Hashim Thaçin ishte në presion nga shumë aspekte. Kishte një presion të jashtëzakonshëm nga komandantët lokal, dhe kishte një presion ideologjik, kulturor veçanërisht nga Adem Demaçi”, ka thënë Williams.
Ai ka thënë se Adem Demaçi në atë kohë po thoshte shumë gjëra nga jashtë prandaj edhe Thaçi duhej të shkonte në takim me të.
“Takimi ishte shumë i rëndësishëm apo kritik sepse, Hashim Thaçi duhej të demonstronte se ai po përfshihej me Adem Demaçin, në kuptimin se ai kishte komunikim me të, sepse Adem Demaçi po thoshte shumë gjëra nga jashtë. Demaçi ishte një person intelektual, shumë i respektuar, në moshë shumë më të thyer kështu që në mënyrë të tillë për të nënshkruar marrëveshjen ishte e domosdoshme që të shkonte në takim me Adem Demaçin dhe të kishte një bisedë me të”, ka shtuar ai.
Gjithashtu, Williams ka thënë se nuk ka pas përshtypje që Thaçit i duhej një miratim nga Demaçi por që sipas tij i duhej mbështetja e tij që të nënshkruhej marrëveshja.
