Mbretëria e Bashkuar, Kanadaja dhe Australia kanë shpallur njohjen zyrtare të shtetit të Palestinës si pjesë e përpjekjeve ndërkombëtare për të ringjallur zgjidhjen me dy shteteve.
Market Florenti
Kryeministri i Mbretërisë së Bashkuar, Keir Starmer, ka njoftuar sot se vendi i tij njeh zyrtarisht shtetin e Palestinës, raporton BBC.
“Sot, për të ringjallur shpresën për paqe dhe një zgjidhje me dy shtete, deklaroj – si kryeministër i këtij vendi – se Mbretëria e Bashkuar njeh zyrtarisht shtetin e Palestinës” – u shpreh ai në një video-paraqitje.
Më herët gjatë ditës, Kanadaja u bë vendi i parë i G7-ës që mori këtë hap, ndërsa menjëherë pas saj erdhi edhe vendimi i Australisë.
Kryeministri australian, Anthony Albanese, tha se kjo është pjesë e një përpjekjeje të përbashkët me Kanadanë dhe Britaninë për të mbështetur një zgjidhje ndërkombëtare.
Kryeministri kanadez, Mark Carney, deklaroi: “Nga sot, Kanadaja njeh shtetin e Palestinës.”
Kundërshtime për këtë hap kanë ardhur nga Izraeli, ku kryeministri Benjamin Netanyahu ka deklaruar më parë se njohja e shtetit palestinez “shpërblen terrorin e Hamasit” dhe “forcon refuzimin e tyre për të liruar pengjet.”
Edhe familjet e pengjeve izraelite që mbahen në Gaza janë shprehur të shqetësuara. Në një letër të hapur drejtuar Keir Starmer-it, ato kanë theksuar se njohja “e ndërlikon përpjekjen për të kthyer në shtëpi të dashurit tanë.”
Starmer theksoi se ky vendim nuk është një shpërblim për Hamasin, dhe shtoi se ka takuar familjet britanike të pengjeve që ndihen të torturuara çdo ditë nga situata në Gaza. “Pengjet duhet të lirohen menjëherë. Ne do të vazhdojmë të luftojmë për t’i kthyer ata në shtëpi,” tha ai.
“Thirrja jonë për një zgjidhje të sinqertë është e kundërta e vizionit plot urrejtje të Hamasit,” shtoi Starmer.
Ndërkohë, ofensiva tokësore e Izraelit në qytetin e Gazës vazhdon. Ushtria izraelite (IDF) njoftoi më herët se ka kapur dy raketa të lëshuara nga veriu i Rripit të Gazës. BBC
