Kandidati për Asamblenë Komunale të Skenderajt nga Lëvizja Vetëvendosje, Ilir Seferi, ka reaguar ashpër ndaj deklaratave të kandidatit për kryetar të kësaj komune, Sokol Halili.
Seferi ka mohuar pretendimet e Halilit, sipas të cilit ai është “njeri i Sami Lushtakut”, se po ndërton një “shtëpi shumëkateshe” në Skenderaj, ka “marrë klubin e futbollit” apo i ka “blerë një makinë birit të Sami Lushtakut, Mërgim Lushtakut”.
Ai e ka cilësuar këtë nivel akuzash si të papranueshëm për një kandidat për kryetar komune, duke thënë se në vend të etikës politike, Halili po përdor gënjeshtra për përfitime elektorale.
Seferi i ka bërë thirrje publike Halilit që brenda 4 orëve të tërheqë deklaratat dhe të kërkojë falje publike për dëmin e shkaktuar. Në të kundërtën, ai ka paralajmëruar ndjekje ligjore për shpifje.
“Unë nuk mund ta ul nivelin tim dhe të Lëvizjes Vetëvendosje duke u marrë me shpifje, por do të mbroj gjithmonë me vendosmëri emrin, integritetin dhe të vërtetën. Për çdo pretendim ndaj meje, kërkoj publikisht: sillni letrat, dokumentet dhe faktet. Në mungesë të tyre, gjithçka tjetër është shpifje”,tha kandidati i Vetëvendosjes për asamble.
