Anëtari i Lëvizjes Vetëvendosje, Enver Dugolli i ka reaguar kryetarit të Nismës Socialdemokrate të Kosovës, Fatmir Limaj i cili ka thënë se askush nuk duhet të bëjë marrëveshje për bashkëqeverisje me Vetëvendosjen përderisa, Dimal Basha është kryetar i Kuvendit.
Dugolli ka thënë se askush nuk duhet të bëjë kushtëzime nëse ka dëshirë që të ecët përpara në formimin e institucioneve.
Ai në Tëvë1 i pyetur për deklaratën e Limajt ka thënë se me kushtëzime nuk mund të ecët përpara.
“Me kushtëzime nuk është mirë të ecët dhe z.Limaj edhe kush do qoftë që dëshiron të kemi institucione, të ecim përpara dhe ta përmbyllim një proces dhe t’i hap perspektivë një procesi. Nuk është mirë me kushtëzime, sepse nuk arrihet asgjë”, ka thënë Dugolli.
Duke folur për kërkesën që Limaj kishte që ta merrte postin e kryetarit të Kuvendit për ta votuar Qeverinë Kurti 3, ka thënë se tashmë kjo situatë është kaluar dhe se kryetari i Kuvendit është zgjedhur.
“E kemi kaluar atë situatë, jemi të qeveria dhe do të shohim si do të rrjedhin gjërat, jemi në një situatë që do të ishte mirë të kemi një qeveri që do t’i kalonte disa procese, tash po afron fundi i vitit do duhej të kemi buxhetin e miratuar, sepse hyjmë pastaj në faza kritike të funksionimit të shtetit dhe këtu kanë përgjegjësi të gjithë”, ka thënë Dugolli.
Limaj dje ka thënë se asnjë parti nuk duhet bërë marrëveshje me LVV-në përderisa kryetar i Kuvendit është Basha.
“Basha e ka fyer në tërësi kombin, kështu që ky aksident që ka ndodhur në Kuvend duhet të kthehet e të përmirësohet dhe ky njeri nuk mundet e nuk është për mua jo por për asnjë kryetar i Kuvendit. Me Bashën nuk duhet as unë as askush me qenë e hapur për marrëveshje me LVV-në”, deklaroi ai.
