Ibrahim Rugova i kishte thënë ushtruesit të detyrës së Sekretarit amerikan të Shtetit, Strobe Talbott, se veprimet e “grupeve të pakënaqura”, duke iu referuar UÇK-së, po përdoren si pretekst nga Sllobodan Millosheviqi për të nisur masakra në Kosovë.
Kjo bisedë daton nga 1 qershori i vitit 1998, në një takim të zhvilluar në Uashington mes një delegacioni të Kosovës dhe asokohe ushtruesi i detyrës së Sekretarit amerikan të Shtetit, Strobe Talbott, sipas një kabllogrami të cilin e ka publikuar Xhavit Haliti.
Haliti e publikoi kabllogramin si kundërpërgjigje ndaj reagimeve që shkaktoi një deklaratë e tij të martën, në të cilën hodhi akuza në drejtim të këtij delegacioni të Kosovës me pretendimin se ka bërë propagandë kundër UÇK-së, Shqipërisë dhe Fatos Nanos.
“Një vend të kundërpërgjigjes ndaj disa reaguesve: ja kabllogrami nga takimi i delegacionit të Kosovës, udhëhequr nga Ibrahim Rugova, me presidentin e ShBA-ve, Bill Clinton”, tha Haliti në një publikim në rrjetet sociale të mërkurën.
“Për korrektësi të opinionit publik: pjesë e këtij delegacioni nuk ka qenë Mahmut Bakalli”, shkroi ish-deputeti i Partisë Demokratike të Kosovës, i cili të martën në disa deklarata në televizionin T7 pretendoi se pjesë e delegacionit kishte qenë edhe Bakalli, ish-funksionar i Lidhjes Komuniste të ish-Jugosllavisë në Kosovë.
Në kabllogramin e Departamentit të Shtetit, të publikuar nga Haliti, thuhet se në lidhje me Ushtrinë Çlirimtare të Kosovës (UÇK), Rugova tha se ka shumë grupe të pakënaqura në Kosovë, “veprimet e të cilave po përdoren si pretekste nga Millosheviçi për të nisur masakra”.
Përpos akuzës për propagandë kundër UÇK-së në takim me Clinton-in, ish anëtari i Byrosë Politike të UÇK-së hodhi akuza të tjera të rënda në drejtim të LDK-së, në intervistën e tij në T7 të martën.
Ai, tha se një zyrtar i LDK-së – në emër të Rugovës – i kishte shkruar një letër ish-presidentit Clinton kundër të dërguarit të ShBA-së në Ballkan, diplomatit Robert Gelbard.
Deklarata shkaktoi menjëherë reagime të ashpra.
I pari reagoi i apostrofuari nga Haliti, publicisti Veton Surroi, i cili e quajti “krejtësisht të pavërtetë” pretendimin e Halitit. Tha se delegacioni që kishte takuar ish-presidentin amerikan Bill Clinton kishte kërkuar mbrojtje amerikane.
Ndërsa, funksionari i Lidhjes Demokratike të Kosovës, Bajram Gecaj i cilësoi deklaratat e Xhavitit si “të pabesueshme” dhe “një trillim të ulët”.
Gecaj tha se Haliti duhet “të ndihet i turpëruar” nga, siç e quajti ai, propaganda e vazhdueshme kundër LDK-së, raporton Paparaci.
“Unë i kam lexuar thuaja të gjitha librat e akterëve të rëndësishëm të SHBA-ve të involvuar në çështjen e Kosovës dhe diçka të tillë nuk kam parë e lexuar askund!”, tha Gecaj, i cili kishte qenë zyrtar i LDK-së edhe në periudhën e fundviteve ’90. /Paparaci.com
