Gjykata Themelore në Ferizaj ka aprovuar pjesërisht padinë e Mustafë Graincës kundër, tashmë Kryekuvendarit Dimal Basha, duke e detyruar këtë të fundit të paguajë kompensim prej 25,000 eurosh për dëmin e shkaktuar nga shpifjet dhe fyerjet e publikuara në portalin “Insajder” dhe në Facebook.
Aktgjykimi, i nënshkruar më 22 korrik 2025 nga gjyqtarja Kreshnike Zymberi Beqiri, përmban disa dispozita të rëndësishme.
Detyrimi për tërheqjen e shkrimeve
Sipas vendimit gjyqësor, të cilin e ka siguruar Gazeta Nacionale, Basha detyrohet të tërheqë shkrimin editorial të publikuar më 1 korrik 2019 në “Insajder”, si dhe shkrime të tjera të datuara 22 korrik, 10 shtator dhe 30 janar 2020, të publikuara në llogarinë e tij në Facebook.
“DETYROHET i padituri që ta tërheq shkrimin editorial të publikuar në portalin ‘Insajder’ me datë 01.07.2019 si dhe të tërheq shkrimet e datave 22.07.2019, 10.09.2019, 10.01.2020, 22.01.2020 dhe 30.01.2020 të publikuar në llogarinë e tij në rrjetin sociale ‘Facebook’,” thuhet në aktgjykim.
Kërkesë falje publike
Gjykata ka shkuar edhe më tej, duke urdhëruar që Basha të kërkojë falje publike për z. Grainca, si në portalin “Insajder” ashtu edhe në llogarinë e tij në Facebook. Kjo duhet të bëhet brenda tetë ditësh nga plotfuqishmëria e aktgjykimit, nën kërcënimin e pasojave ligjore.
“DETYROHET i padituri që t’i kërkoj falje publike paditësit, e cila duhet të bëhet në portalin ‘Insajder’ ku është bërë publike përmbajtja fyese dhe shpifëse si dhe në llogarinë e tij në rrjetin sociale ‘Facebook’, me premtimin se nuk do ta përsërisë fyerje të tilla,” thuhet në vendim.
Kompensimi financiar dhe kamatat
Kompensimi prej 25,000 eurosh duhet të paguhet brenda 15 ditësh, së bashku me kamatë ligjore prej 8% që fillon nga data e paraqitjes së padisë më 22 korrik 2019. Përveç kësaj, Basha detyrohet të paguajë edhe shpenzimet e procedurës në vlerë prej 2,607 eurosh.
Gjykata refuzoi kërkesën e paditësit për kompensim shtesë prej 40,000 eurosh për vuajtje shpirtërore, duke e konsideruar atë si të pabazuar.
Historiku i çështjes
Mustafë Grainca, i përfaqësuar nga avokati Jeton Berisha, kishte paraqitur padinë fillestare më 22 korrik 2019, duke pretenduar se Basha kishte publikuar përmbajtje shpifëse dhe fyese në lidhje me aktivitetin e tij biznesor dhe funksionin publik.
Në një vendim të mëparshëm të datës 28 korrik 2022, Gjykata e Ferizajit kishte refuzuar padinë. Megjithatë, Gjykata e Apelit e Kosovës e prishi atë aktgjykim më 25 nëntor 2024, duke e kthyer çështjen për rigjykim.
Ky rast vjen në një kohë kur debati mbi ekuilibrin mes lirisë së shtypit, si dhe propozimet që vijnë nga deputetët e Lëvizjes Vetëvendosje për ta kriminalizuar shpifjen.
