Nënkryetarja e Kuvendit të Kosovës nga radhët e komuniteteve jo shumicë jo serbe, Emilia Rexhepi, ka thënë se gjithmonë do t’i respektoj vendimet e Gjykatës Kushtetuese. Në një deklaratë për RTV21, ajo u shpreh se zgjedhja e saj si nënkryetare e Kuvendit është bërë në përputhje të plotë me rregulloren e Kuvendit dhe ligjet në fuqi, duke theksuar se ka marrë 73 vota, numër i mjaftueshëm për të legjitimuar pozitën e saj.
”Unë gjithmonë i kam respektuar vendimet e Gjykatës Kushtetuese dhe presim edhe 12 ditë për të votuar nënkryetarët nga komuniteti serb. Unë, si përfaqësuese e komuniteteve të tjera, jemi koordinuar brenda grupit që prej 7 deputetëve të jem unë nënkryetarja e grupit. Sipas Rregullores së Kuvendit dhe sipas ligjit, unë i kam marrë 73 vota dhe jam nënkryetare e Parlamentit,” tha Rexhepi.
Rexhepi shtoi se përfaqësuesit e komuniteteve jo shumicë jo serbe janë koordinuar brenda grupit të tyre dhe se kandidatura e saj është propozuar në mënyrë të rregullt, dhe nëse rikthehet votimi në pako ajo do ta respektojë.
“Ne kemi propozuar para se të votohej. Elbert Krasniqi ka shpjeguar në Kuvend se ne dëshirojmë të votohet veçmas dhe se procesi është legjitim. 73 vota janë të mjaftueshme për të zgjedhur një nënkryetar,” shtoi ajo.
