Kryeministri në detyrë Albin Kurti në një tubim elektoral në Prishtinë ka goditur ashpër kandidatin e PDK-së për kryetar të Prishtinës, Uran Ismailin.
Kurti ka thënë se Uran Ismaili ja ka bërë vetëm një të mirë Prishtinës, atëherë kur e mbylli lokalin Bon Vivant ku siç thotë Kurti ku dy veta hynë të qeshur, e dolën të vdekur, raporton Gazeta Online Veriu.info.
“Njëri nga ta jo fort moti, ja ka bërë një të mirë Prishtinës, qysh atëherë kur e mbylli lokalin e tij që ishte shndërru në vend krimi. Lokali që e kishte emrin Bon Vivant, bon vivant dmth ai që rrnon mirë, ai që ka jetesë të mirë por aty u vranë dy veta. Pra, ai që rrnon mirë por dy veta që hynë të qeshur dolën të vdekur.” – ka thënë Kurti.
Si duket Kurti foli direkt për dy vrasje të rënda që kishin ndodhur në këtë lokal në pronësi të Ismailit, njëra e vitit 2014 dhe tjetra e vitit 2023.
Më 13 tetor të vitit 2014 në lokalin Bon Vivant u vra sigurimi i këtij lokali Rrahman Uka, ngjarje për të cilën akuzohen dy persona Masar Gërdovci dhe Sherif Krasniqi. Këta dy ishin për shumë vite në proces gjyqësor derisa u dënuan për herë të katërt nga shkalla e parë me 25 vite burgim në maj të vitit të kaluar.
Rasti i dytë ndodhi natë e 4 gushtit 2023, ku sërish një person u vra brenda lokalit Bon Vivant. Në rastin e dytë mbeti i vrarë Kastriot Ramadani kurse i akuzuar për ngjarjen ishte Andi Pajaziti i njohur si “Italiani”.
Ai u lirua më pas nga akuza e vrasjes për t’u dënuar me dy vite burgim për armëmbajtje pa leje.
