Maliq Sheholli, babai i Fatmir Shehollit, u vra më 9 janar të vitit 1997.
Vrasjen e tij e mori përsipër Ushtria Çlirimtare e Kosovës përmes një komunikate të lëshuar më 12 janar të atij viti.
Një ish-deputet i Partisë Socialiste të Serbisë, Maliq Sheholli konsiderohej person i dyshuar për bashkëpunim me regjimin serb dhe policët e dhunshëm të Sllobodan Millosheviqit.
Në komunikatën numër 28 të lëshuar nga UÇK-ja, bëhej e ditur se Ushtria Çlirimtare e Kosovës kishte arritur të vriste dy shqiptarë. Të dy dyshoheshin për bashkëpunim me regjimin e dhunshëm të Millosheviqit.
Vrasja e parë ishte kryer më 26 dhjetor të vitit 1996. Cak i sulmit ishte Fadil Bellopoja.
Ndërsa, vrasja e dytë ishte kryer më 9 janar, sipas UÇK-së. Viktimë ishte Maliq Sheholli.
“Më 26 dhjetor 1996 dhe më 9 janar 1997 në zonën operative numër 1 njësitë tona të armatosura kryen dy atentate kundër bashkëpunëtorëve të okupatorit serb në Kosovë”, thuhej në komunikatën e lëshuar më 12 janar 1997.
Në komunikatën nr. 28 të UÇK-së, Sheholli përshkruhej si “bashkëpunëtor i vjetër i UDB-së” dhe pjesëmarrës në varrimin e antishqiptarit dhe kriminelit serb Millosh Nikoliq.
“Atentati i parë u krye kundër Fail Bellopojës, në fshatin Besi të Podujevës, veprimtaria e të cilit u vlerësua si tejet e rrezikshme dhe antikombëtare, ndërsa i dyti kundër Maliq Shehollit i cili ishte deputet i PSS, bashkëpunëtor i vjetër i UDB-së, pjesëmarrës në varrimin e antishqiptarit dhe kriminelit serb Millosh Nikoliq (i cili u ekzekutua nga njësitë tona më 25.10.1996) me ç’rast mbajti edhe një fjalim mortor”, thuhej në këtë komunikatë.
Djali i Maliqit, Fatmir Sheholli u arrestua të mërkurën në Prishtinë nën dyshimin për spiunazh.
Shtëpia e Shehollit u bastis nga hetuesit policorë, me urdhër të Prokurorisë Speciale, sipas një njoftimi të Prokurorisë.
Ndërsa, Fatmir Sheholli u ndalua për 48 orë me urdhër të prokurorit të rastit. /Paparaci.com
