Sot në Drejtorinë e Përgjithshme të Policisë së Kosovës është mbajtur takimi zyrtar lidhur me planifikimet dhe angazhimin e Policisë në zbatimin e planit operativ “Zgjedhjet lokale 2025”, të cilat do të mbahen me datën 12 tetor 2025.
Në këtë takim kanë marrë pjesë edhe Ushtruesi i Detyrës së Kryeprokurorit të Shtetit, Besim Kelmendi dhe Koordinatorja Nacionale për Zgjedhje, prokurorja Laura Pula, si dhe menaxhmenti i lartë, në krye me drejtorin e Përgjithshëm të Policiës,Gazmend Hoxha, drejtorët e departamenteve si dhe udhëheqës e përfaqësues të institucioneve vendore dhe ndërkombëtare nga KQZ-ja, KFOR-i, EULEX-i, OSBE-ja dhe zyra e BE-së në Kosovë.
Të pranishmit, siç njofton policia, janë njoftuar lidhur me planifikimet, vlerësimet dhe angazhimet policore, në ofrimin e sigurisë dhe mbarëvajtjes së procesit zgjedhor, si dhe për bashkërendimin dhe koordinimin e aktiviteteve të përbashkëta të parapara sipas marrëveshjes së bashkëpunimit në mes të institucioneve kompetente vendore, me qëllim të ofrimit të sigurisë dhe mbarëvajtjes së procesit zgjedhor.
“Ndër të tjera pjesë e diskutimit ishte krijimi i një klime të qetë dhe të sigurt, me qëllim të ushtrimit të së drejtës së votimit të lirë për të gjithë qytetarët, si edhe inicimi e procedimi i çdo vepre penale kundër të drejtës së votimit dhe ndërmarrjes së të gjitha masave procedurale/penale ndaj çdokujt që bie ndesh me ligjet e vendit që rregullojnë/sanksionojnë veprimet e kundërligjshme ndaj zgjedhjeve të lira dhe demokratike, në koordinim dhe bashkëpunim të ngushtë me Prokurorinë e Shtetit, sipas planeve të veprimit dhe marrëveshjeve paraprake të bazuara në ligj”, thuhet në njoftimin e Policisë.
Në terren gjatë 12 tetorit do të jenë rreth 100 prokurorë dhe zyrtarë të Prokurorisë të cilët do të qëndrojnë në detyrë deri në përfundimin e zgjedhjeve.
