Bashkëkryetarja e partisë Guxo, Donika Gërvalla, ka kërkuar nga organet e drejtësisë që të hetojnë rezultatet e exit-polleve për komunën e Mitrovicës ku kandidoi kryetari tjetër i kësaj partie, Faton Peci.
Sipas Gërvallës, shifrat e publikuara nga këto exit poll-e nuk ishin “pasojë e ndonjë gabimi teknik apo “huqjeje” të rastësishme”, por sipas saj, tregojnë për një inxhiniering.
Kjo deklaratë e Gërvallës ishte e ngjashme me atë të kryetarit të Vetëvendosjes, Albin Kurti, i cili kërkoi hetim për exit poll-et.
“Partia Guxo shpreh shqetësim të thellë për ndërhyrjet e dyshuara dhe manipulimet e qëllimshme që janë bërë gjatë ditës së zgjedhjeve lokale, më 12 Tetor, në raportimet për Komunën e Mitrovicës. Publikimi i lajmeve dhe rezultateve të rreme, para përfundimit të procesit të votimit, dhe shpërndarja e exit-polleve me dallime skandaloze prej mbi gjashtëmbëdhjetë përqind nga më shumë se një organizatë dhe për të njëjtën komunë, përbëjnë një rast të paprecedent që cenon drejtpërdrejt integritetin e procesit zgjedhor. Këto veprime nuk janë thjesht pasojë e ndonjë gabimi teknik apo “huqjeje” të rastësishme, por tregojnë për një inxhiniering të mirëfilltë të ndërhyrjes në zgjedhje, me synim ndikimin në perceptimin publik dhe në rezultatin përfundimtar”, ka shkruar ajo.
Gërvalla tha se partia e saj do të “mbrojë integritetin e votës”.
“Partia Guxo u bën thirrje institucioneve të drejtësisë dhe të sigurisë që të hetojnë në mënyrë të plotë dhe të paanshme këtë çështje, për të zbardhur përgjegjësitë individuale dhe institucionale. Ruajtja e besimit qytetar në proceset zgjedhore është shtylla themelore e demokracisë dhe çdo tentativë për ta cenuar atë duhet të trajtohet me seriozitetin më të lartë. Partia Guxo mbetet e përkushtuar në mbrojtjen e integritetit të votës së lirë, të procesit demokratik dhe të institucioneve të Republikës së Kosovës”.
Pas deklaratave të Kurtit për hetim të exit poll-eve, dje Asociacioni i Gazetarëve të Kosovës ka reaguar duke e cilësuar thirrjen e Kurtit si të rrezikshme.
“Asociacioni i Gazetarëve të Kosovës (AGK), e sheh me shqetësim deklaratën publike të kryetarit të Vetëvendosjes, kryeministrit në detyrë, Albin Kurti për hetim nga ana e “organeve të drejtësisë dhe sigurisë”, pas publikimit të exit polleve nga tri televizione, për zgjedhjet lokale. Mediat në Kosovë kanë respektuar Ligjin për Zgjedhjet dhe rregulloren e KPM-së, dhe nuk kanë postuar asnjë Exit Poll, para orës 19:00, deri në momentin kur janë mbyllur qendrat e votimit. Rrjedhimisht, nuk ka pasur asnjë ndërhyrje në procesin zgjedhor nga ana e mediave. AGK-ja i vlerëson si shumë të rrezikshme thirrjet e Kurtit për hetime pas publikimit të këtyre Exit Polleve, pasi që ato përbëjnë sulm të hapur ndaj lirisë së medias. Exit Pollet kanë histori të gabimeve edhe në shumë vende të tjera demokratike, duke përfshirë SHBA-të në vitin 2016”, u tha në reagimin e AGK-së.
Po ashtu, për thirrjet e Kurtit për hetim ka reaguar edhe juristja e të drejtës së mediave, Flutura Kusari, e cila tha se deklarata e Kurtit është e pasaktë.
“Procesi zgjedhor ka qenë i përfunduar kur janë publiku exit polls. Unë i ftoj organet e ndjekjes me qëndru sa më larg, sa më larg, idesë së hetimit të raportimeve dhe kompanive që bëjnë exit polls. Poashtu, ma merr mendja që KPM-ja është duke i fërku duart dhe duke e shiku mundësinë me u përzi meqë Kurti ka bërë thirrje”./Express/
