Gazetari dhe analisti politik, Lirim Mehmetaj, ka ngritur dyshime serioze mbi marrëdhënien ndërmjet Lëvizjes Vetëvendosje dhe kompanisë së njohur për hulumtime dhe sondazhe, UBO Consulting.
Ai ka publikuar disa dokumente që sipas tij janë nga Komisioni Qendror i Zgjedhjeve (KQZ), të cilat tregojnë se Vetëvendosja i ka paguar kësaj kompanie një shumë prej 48,753 euro gjatë periudhës 2020–2024, transmeton lajmi.net.
“Sipas listave zyrtare të KQZ-së për shpenzimet e partive politike, Vetëvendosja vetëm nga viti 2020 deri në vitin 2024 e ka paguar UBO-në 48 mijë e 753 euro për hulumtime dhe sondazhe,” ka shkruar Mehmetaj në postimin e tij.
Publikimi i këtyre dokumenteve vjen pas përplasjeve publike që Vetëvendosja ka pasur me UBO-n, veçanërisht pas publikimit të exit poll-it për Mitrovicën e Jugut, ku kompania e nxori kandidatin e VV-së, Arian Tahiri, fitues pa balotazh. Kjo, sipas Mehmetajt, ka nxitur një reagim të qëllimshëm nga VV për të zhvendosur vëmendjen nga manipulimet e mundshme.
“Kjo është veç një provë tjetër se Vetëvendosja vetë e di se ka bërë diçka në Mitrovicë për ta ndryshuar rezultatin në favor të kandidatit të vet,” ka shkruar ai. “Sulmet ndaj UBO-s tash janë veç një segment i strategjisë ‘mbrojtja më e mirë është sulmi’.”
Mehmetaj thotë se tashmë është i bindur se rezultati përfundimtar në Mitrovicë, ku Arian Tahiri nuk arriti të fitojë pa balotazh, është produkt i një “makinacioni politik” nga Vetëvendosja.
“Lutem që policia të jetë vigjilente e të hetojë të gjitha pistat,” përfundon ai.
Gazetari u bën thirrje institucioneve të drejtësisë që të shqyrtojnë me seriozitet të gjitha faktet dhe dokumentet që lidhen me këtë rast.
Postimi i plotë:
Si ia dha Vetëvendosja UBO-s afër 50 mijë euro për sondazhe…
Sipas listave zyrtare të KQZ-së për shpenzimet e partive politike, Lëvizja Vetëvendosje vetëm nga viti 2020 deri në vitin 2024 e ka paguar kompaninë UBO Consulting 48 mijë e 753 euro.
Këto pagesa Vetëvendosja shkruan se ia ka bërë UBO-s për hulumtime dhe sondazhe.
Por, për rezultatet e exit-pollit në Mitrovicë të Jugut, ku UBO e nxirrte fitues Arian Tahirin pa balotazh, Vetëvendosja po thotë se duhet me e hetu kompaninë.
Kjo është veç një provë tjetër se Vetëvendosja vetë e di se ka bërë diçka në Mitrovicë për ta ndryshuar rezultatin në favor të kandidatit të vet.
Prandaj, sulmet ndaj UBO-s tash janë veç një segment i strategjisë “mbrojtja më e mirë është sulmi”.
Tashmë jam i bindur se rezultati që doli si përfundim në Mitrovicë ku Arian Tahiri e mposht vetëm për pak Faton Pecin e nuk shkon pa balotazh siç e prezantoi UBO, është një makinacion i Vetëvendosjes.
Lutem që policia të jetë vigjilente e të hetojë të gjitha pistat
