Gjykata Kushtetuese e Kosovës, ka konfirmuar se ka pranuar ankesë nga Lista Serbe, në lidhje me votimin e Nenad Rashiqit si nënkryetar i Kuvendit të Kosovës nga komuniteti serb.
“Konfirmojmë pranimin e kërkesës nga përfaqësuesit e Listës Serbe”, ka thënë shkurtimisht Gjykata Kushtetuese.
Deputetët e Listës Serbe, i janë drejtuar sot përsëri Gjykatës Kushtetuese, me një ankesë lidhur me zgjedhjen e nënkryetarit të Kuvendit nga radhët e komunitetit serb, duke pretenduar se janë shkelur Kushtetuta, Rregullorja e punës së Kuvendit, si dhe një aktgjykim i mëparshëm i Gjykatës Kushtetuese.
“Po ashtu, kemi kërkuar vendosjen e një mase të përkohshme për të ndaluar veprimet antikushtetuese që mund të shkaktojnë dëme të pakthyeshme”, thuhet në njoftimin e Listës Serbe, partisë kryesore të serbëve të Kosovës që gëzon mbështetjen e Beogradit.
Zgjedhja e Nenad Rashiqit si nënkryetar i Kuvendit të Kosovës, është bërë me 10 tetor, duke mundësuar përfundimisht konstituimin e Kuvendit të Kosovës pas disa muajve bllokadë në vend.
Fillimisht, Kuvendi i Kosovës ishte i bllokuar që nga 15 prilli, në seancën e parë konstituive pas zgjedhjeve të 9 shkurtit. Partia e parë e dal nga zgjedhjet e 9 shkurtit, kishin propozuar për kryetare të Kuvendit disa herë radhazi Albulena Haxhiun, e cila nuk arrinte t’i merrte dot 61 votat e nevojshme për t’u zgjedhur kryetare e Kuvendit.
Pas këtyre tentimeve, LVV vendosi që të kaloj në votim të mbyllur por që as kjo nuk votohej nga deputetët e PDK-së, LDK-së, AAK-së dhe Listës Serbe, pasi sipas tyre ndryshimi i mënyrës së votimit në mes të procesit, është shkelje e ligjit. Të njëjtën e ka konfirmuar Gjykata Kushtetuese, e cila pati thënë qartë përmes një aktgjykimi se votimi duhet të jetë i hapur dhe se një kandidat mund të propozohet vetëm tri herë për kryetar të Kuvendit.
VV më pas propozoi disa emra të cilët “i dogji” duke i propozuar nga tri herë, deri kur me herën e dytë u votua kryetari aktual i Kuvendit të Kosovës, Dimal Basha.
Pas tij u votuan edhe tre nënkryetarët shqiptar, Albulena Haxhiu nga VV, Vlora Çitaku nga PDK dhe Kujtim Shala nga PDK. Në të njëjtën ditë gjithashtu është votuar edhe nënkryetarja Emilja Rexhepi, por procesi ngeci te nënkryetari serb.
Të gjithë deputetët e Listës Serbe u propozuan nga tri herë por nuk u votuan me ç’rast u dogjën, e gjithashtu edhe Nenad Rashiqi për të cilin u luftua shumë nga VV që të votohej por përsëri nuk u votua.
Lista Serbe dërgoi ankesë në Gjykatë Kushtetuese, e të njëjtit thanë se Kuvendi nuk është i konstituuar pa votimin e nënkryetarit serb, duke iu dhënë kohë 12 ditë nga publikimi i aktgjykimit për të konstituuar Kuvendin.
Kryetari i Kuvendit Dimal Basha, propozoi përsëri nga tre herë të gjithë deputetët e Listës Serbe por që nuk i morën votat, ndërsa për Nenad Rashiqin votuan deputetët e VV-së dhe at të LDK-së, me ç’rast edhe u konstituua Kuvendi.
Për ankesën e fundit nga Lista Serbe drejtuar Kushtetueses, ata nuk kanë treguar se kur pritet të merret një vendim dhe të publikohet aktgjykimi. /Lajmi.net/
