Rezultatet preliminare të Komisionit Qendor të Zgjedhjeve (KQZ) e nxorën fitues edhe për një mandat në krye të Komunës së Istogut kandidatin Lidhjes Demokratike të Kosovës, Ilir Feratin.
Kur kanë mbetur edhe 10 ditë nga afati për formimin e Qeverisë, Ilir Ferati, si anëtar i Kryesisë së LDK-së, ka deklaruar se do të votonte kundër një koalicioni LVV-LDK për formimin e Qeverisë.
“Ky është mendimi im politik dhe personal duke e bazu në sjelljen e LVV-së dhe mënyrën qysh ata e kanë konsumu kohën deri tash”- tha ai kur u pyet nëse do ta çonte dorën kundër koalicionit me LVV.
Ferati ka deklaruar se vendi duhet të shkojë në zgjedhje të jashtëzakonshme.
“Është vonë për pjesën e bisedimeve, sa kohë ka shku prej zgjedhjeve nacionale. Bisedimet është dashtë me u kry ma herët. Konsideroj se kjo legjislaturë duhet të marrë rikonfirmim nga elektorati, mendoj që duhet me shku drejt zgjedhjeve të jashtëzakonshme… Është detyrë, obligim ligjor, moral e politik e atij që fiton shumicën të ndërtojë së pari komunikimin me solidaritet e pastaj koalicionin e mundshëm”- tha ai.
Ferati ka komentuar po ashtu edhe rezultatet preliminare të KQZ-së për zgjedhjet lokale në disa prej komunave të vendit, ku LDK nuk doli e para.
Për ish-bastionet e kësaj partie, si Gjilani, Vushtrria, Ferati u shpreh i habitur me rezultatin.
Për rezultatet në Gjilan, të cilat nxorën të parin Alban Hysenin e LVV-së, Ferati tha se duhet një analizë e degës së LDK në Gjilan.
Ndërsa, sa i përket koalicioneve për Asamblenë Komunale, i pari i Istogut u shpreh se së në vitin 2021 kishte qenë LVV partia të cilës Ferati i kishte ofruar koalicion por që nuk kishte marrë përgjigje nga ta.
“Po e përmend për herë të parë se në vitin 2021 ofertën e parë për koalicion ia kam bërë LVV-së, ftesë për me u ulë në tavolinë. Dhe ua kam bërë ofertën për me i hapë diskutimet. Nuk e di a janë frikësu prej meje a nga pushteti, por nuk kam marrë përgjigje fare. Është hera e parë që po e përmend”- tha Ferati në “Kallxo Përnime”.
