Deputetja e Lidhjes Demokratike të Kosovës, Rrezarta Krasniqi, ka reaguar pas zhvillimeve të fundit, ku kandidati i LDK-së për kryetar të Vushtrrisë, Xhafer Tahiri, që humbi në zgjedhjet lokale të 12 tetorit, bëri koalicion me Lëvizjen Vetëvendosje për rundin e dytë të zgjedhjeve.
Duke shprehur shqetësim për gjendjen e krijuar dhe atmosferën që, sipas saj, ka rënduar anëtarësinë e LDK-së në këtë komunë, Krasniqi thotë se ditët e fundit kanë qenë të ndjeshme për strukturat dhe aktivistët që me përkushtim e kanë mbajtur gjallë LDK-në në Vushtrri.
“Pas ngjarjeve të fundit në degën e LDK-së në Vushtrri, shpreh shqetësim të thellë për gjendjen e krijuar dhe atmosferën që ka rënduar anëtarësinë tonë. Këto ditë kanë qenë të ndjeshme për strukturat dhe aktivistët që me përkushtim e kanë mbajtur gjallë LDK-në në këtë qytet.
LDK ka qenë dhe mbetet shtëpi e përbashkët, forcë unifikuese dhe shembull i maturisë politike. Sot më shumë se kurrë, ftoj të gjithë anëtarët dhe mbështetësit tanë në Vushtrri të qëndrojnë të qetë, të bashkuar dhe besnikë ndaj vlerave që na kanë udhëhequr për mbi tri dekada”, ka shkruar ajo.
Deputetja ka theksuar se beson në rikthimin e qetësisë dhe bashkëpunimit brenda degës së LDK-së në këtë komunë.
“Besoj fort se Lidhja Demokratike e Kosovës do të rikthejë qetësinë, bashkëpunimin dhe drejtimin e duhur në Vushtrri. Me përfshirje, dialog dhe sinqeritet do ta rindërtojmë besimin dhe unitetin që gjithmonë e ka dalluar këtë degë.
LDK do të rikthehet fuqishëm në Vushtrri, me vlerat, traditën dhe njerëzit e saj të mirë, si forcë që bashkon dhe ndërton, jo që ndan”, përfundon reagimi i Krasniqit.
