Ministrja në detyrë e Punëve të Jashtme, Donika Gërvalla, në adresimin e saj para Këshillit të Sigurimit të OKB’së, ka përsëritur kërkesën për mbylljen e UNMIK’ut.
Gërvalla e ka cilësuar këtë mision si humbje parash të OKB’së, teksa ka thënë se nëse UNMIK do të largohej qysh nesër, nuk do të kishte asnjë ndryshim në vend.
“UNMIK-u duhet të mbyllet. Është një humbje e madhe parash të OKB-së. Nuk i shërben më asnjë qëllimi…Nëse UNMIK-u do të largohej nesër, asgjë nuk do të ndryshonte në Kosovë dhe për qytetarët e saj”, ka deklaruar Gërvalla.
Ajo ka thënë se në Kosovë ka institucione demokratike, agjenci ndërkombëtare dhe organizata të OKB-së që po bëjnë punë të shkëlqyer.
Sipas Gërvallës, “raportet e njëanshme të UNMIK-ut” nuk pasqyrojnë të vërtetën e zhvillimeve në terren, “duke i injoruar faktet që dëshmojnë përparimin demokratik të Kosovës dhe përkushtimin e saj ndaj paqes dhe sundimit të ligjit”.Në fund,ministrja Gërvalla ka deklaruar se Kosova po ecën me vendosmëri në rrugën e saj euroatlantike.
Kërkesë për mbylljen e UNMIK pati edhe nga Shtetet e Bashkuara të Amerikës.Përfaqësuesi i SHBA-së në Këshillin e Sigurimit të OKB-së, Jeff Bartos, ka thënë se është koha që UNMIK të mbyllet dhe të bëhet transferimi i funksioneve të tij.
Bartos ka deklaruar se në Kosovë nuk ka krizë sigurie dhe se takimet për UNMIK-un janë të padobishme.“Nuk ka krizë sigurie në Kosovë dhe UNMK-u nuk ka më rol në qeverisjen e Kosovës. Koha ka ardhur që të tërhiqet misioni. Z. Shin i çmojmë përpjekjet e UNMIK-ut për dialog por UNMIK-u është mision paqeruajtës pa paqeruajtës. Është koha të fillojë puna e transferimit të funksioneve nga UNMIK në agjenci më të përshtatshme. SHBA u bën thirrje shteteve anëtare për të mbyllur operacionet e saj. Ky tranzicion është i tepërt. Takimet për UNMIK-un janë të padobishme dhe kjo punë duhet të ndërpritet. Këto takime i dëmtojnë institucionet”, ka deklaruar Bartos.
