Njëri nga kushërinjtë e Faton Pecit, përfitues të granteve nga ministria e udhëhequr nga ai, është edhe biznesmeni Ekrem Peci, i njohur gjerësisht për publikun sidomos në Mitrovicë.
Ai në vitin 2022 kishte marrë grant nga kjo ministri në vlerë 80 mijë euro në projektin e investimit me mekanizëm bujqësor në një pemishte të arrave me sipërfaqe prej rreth 4 hektarësh.
E këtë e ka pranuar sot në një intervistë për një medium vet biznesmeni Peci, i cili ka thënë se ka përfituar grant në vlerë 80 mijë euro në vitin 2022, derisa në vitin 2019 e 2020 ishte refuzuar, transmeton Gazeta Online Veriu.info.
Ai në këtë intervistë ka thënë se i ka plotësuar kushtet për marrjen e grantit, e nuk ka hezituar që ta falënderojë ministrinë për këto mjete, e natyrisht se këtë falënderim do ta bënte secili pasi 80 mijë janë goxha para.
Biznesmeni Ekrem Peci kishte marrë rrogë prej vitesh në Trepçë pa shkuar në punë, dhe vetëm në gusht të 2024 u largua nga puna.
“Ekrem Peci ka bërë shkelje të rëndë të detyrave të punës nga neni 10 paragrafi 1 nën paragrafi 1.27 i Rregullores për përgjegjësinë disiplinore dhe materiale të punëtorëve të Trepça Sh.A., ku sipas raportit me nr.prot:4153 të dt.26.07.2024 i njëjti nuk është paraqitur në punë që nga data 12.07.2024 deri me 23.07.2024 nuk ka respektuar pjesëmarrjen në orar dhe vend të punës, nuk është evidentuar në regjistrin e nënshkrimeve për hyrje-dalje të punonjësve në administratën e drejtorisë së njësisë Biznesore Metalurgjia e Zinkut”, thuhej në vendimin për shkarkim.
