Shoqata e Invalidëve të Luftës së Ushtrisë Çlirimtare të Kosovës – Dega në Drenas ka reaguar ashpër ndaj vendimit të ndërmarrjes “Trepça” SHA për largimin nga puna të invalides së luftës dhe anëtares së familjes së dëshmorit, znj. Megjide Thaçi.
Në reagimin publik të datës 24 tetor 2025, kjo shoqatë e ka cilësuar vendimin si “të padrejtë, të papranueshëm dhe fyerje të rëndë ndaj sakrificës së atyre që dhanë gjithçka për lirinë e Kosovës”.
“Ky veprim përbën një fyerje të rëndë ndaj sakrificës së madhe të atyre që dhanë gjithçka për lirinë e Kosovës. Invalidët e luftës dhe familjet e dëshmorëve janë shtylla të dinjitetit kombëtar dhe moralit shoqëror të Republikës së Kosovës, e jo kategori që duhet të margjinalizohen apo të përjashtohen padrejtësisht nga puna”, thuhet në reagim.
Shoqata ka kërkuar nga menaxhmenti i “Trepçës” dhe institucionet shtetërore që menjëherë të rishikojnë dhe anulojnë këtë vendim, duke rikthyer znj. Thaçi në vendin e saj të punës.
Në të kundërtën, paralajmërohet se Shoqata do të ndërmarrë “të gjitha veprimet ligjore dhe institucionale për mbrojtjen e dinjitetit dhe të drejtave të saj, si dhe të gjithë invalidëve dhe familjeve të dëshmorëve që po përballen me trajtime të padrejta”.
Në fund të reagimit, Shoqata apelon që institucionet e Republikës së Kosovës të tregojnë respekt dhe përkushtim ndaj kategorive të dala nga lufta, duke vepruar në përputhje me ligjet në fuqi dhe me moralin kombëtar.
“Lavdi dëshmorëve të kombit! Nder dhe respekt për invalidët dhe veteranët e UÇK-së!”, përfundon reagimi i nënshkruar nga kryetari i Shoqatës, Fatmir Kiqina.
