Kryesuesi i Komisionit Qeveritar për Personat e Zhdukur, Andin Hoti, i cili u propozua nga mandatari Albin Kurti për postin e Ministrit për Familje dhe Mirëqenie Sociale, ka reaguar pas dështimit të formimit të Qeverisë “Kurti 3”.
Përmes një postimi në Facebook, Hoti tha se vendimi i tij për të pranuar propozimin ka qenë i menduar mirë dhe i bazuar në rrethanat aktuale politike. Ai theksoi se, pavarësisht zhvillimeve, përgjegjësia e tij ndaj njerëzve mbetet e pandryshuar.
“Puna në institucione nuk është privilegj, por detyrë shërbimi ndaj qytetarëve. Pavarësisht që sot nuk u arrit të formohet Qeveria e re, ky është një realitet politik që duhet pranuar me qetësi dhe përgjegjësi”, ka shkruar Hoti.
Ai shtoi se i vjen keq për mungesën e vetëdijesimit të klasës politike për veprim të unifikuar në shërbim të interesave shtetërore dhe kombëtare.
“Jam mirënjohës për vlerësimin dhe besimin që më është dhënë për të udhëhequr një dikaster kaq të rëndësishëm si Ministria për Familjen dhe Mirëqenien Sociale, pjesë e kabinetit qeveritar të z. Kurti, një ministri që përfshin kategoritë më të ndjeshme sociale në Republikën e Kosovës”, shkroi ai.
Në fund, Hoti nënvizoi se politikën e sheh si mjet shërbimi dhe jo përfitimi, duke theksuar se do të vazhdojë të punojë në shërbim të qytetarëve “aty ku është dhe aty ku i besohet puna”.
