Kabineti i propozuar nga kreu i Lëvizjes Vetëvendosje, Albin Kurti – që nuk mori votat e mjaftueshme për t’u bërë Qeveri e re – kishte në përbërje tre zëvendëskryeministra dhe 19 ministrim, ose katër ministri më shumë sesa aktualisht. Disa prej ministrive do të ktheheshin si më herët, por edhe të kishte të reja si ajo për Familjen
Një Qeveri me katër ministri më shumë sesa ajo aktuale në detyrë, e propozoi kreu i Lëvizjes Vetëvendosje, Albin Kurti.
Përbërja e propozuar, që nuk i mori votat e nevojshme për t’u bërë Qeveria “Kurti 3”, ishte kabinet me tre zëvendëskryeministra dhe 19 ministri.
Nëntë nga anëtarët ose ish-anëtarët e Qeverisë “Kurti 2”: Besnik Bislimi, Emilija Rexhepi, Albulena Haxhiu, Faton Peci, Arbërie Nagavci, Rozeta Hajdari, Hajrullah Çeku, Hysen Durmishi dhe Elbert Krasniqi, nuk ishin të propozuar për mandat të ri në ekzekutiv.
Ish-kreu i Kuvendit, Glauk Konjufca, ishte i propozuar për ministër të Punëve të Jashtme dhe zëvendëskryeministër i parë.
Ndërsa kryeparlamentari aktual, Dimal Basha, ishte menduar për Ministër të Infrastrukturës, që do të ndahej nga Mjedisi dhe Planifikimi Hapësinor.
Nga punët e jashtme, Donika Gërvalla ishte e propozuar të kalonte në krye të Ministrisë së Drejtësisë dhe të vazhdonte si zëvendëskryeministre.
Për zëvendëskryeministër i tretë, Kurti e kishte menduar Fikrim Damkën, i cili është ministër në detyrë për Zhvillim Rajonal.
Aktori Fatmir Spahiu për ministër të Kulturës ishte një nga emrat e ri.
Nga zëvendësministër i Punëve të Brendshme dhe Administratës Publike, Blerim Gashani ishte i propozuar të udhëhiqte ministrinë e re: për sport dhe rini.
Po ashtu, avancim ishte menduar edhe për Avni Zogianin – ministër i Arsimit dhe Shkencës.
Një ministri të re, atë për Familjen dhe Mirëqenien Sociale, ishte propozuar ta drejtonte Andin Hoti, i biri i Ukshin Hotit.
Nga këshilltar, Kurti kishte menduar ta avanconte në ministër për Administratë Publike dhe Digjitalizim, Lulzon Jagxhiun.
Emër i ri ishte edhe Sejnur Veshja, nga komuniteti rom, i propozuar për Ministër të Zhvillimit Rajonal.
Deputetët Armend Muja, Dimal Basha, Fitore Pacolli, Mimoza Kusari dhe Rasim Demiri, po ashtu ishin pjesë e kabinetit të propozuar qeveritar.
Në rast vote të suksesshme, nga përbërja aktuale e Qeverisë në dikasteret e njëjta edhe për një mandat do të vazhdonin Arben Vitia, Xhelal Sveçla, Ejup Maqedonci e Nenad Rashiq.
Ndërsa, Hekuran Muratit krahas financave do t’i shtohej ekonomia e Artane Rizvanolli ishte e propozuar si ministre pëër Energji dhe Miniera.
